نائب وزیراعظم اور وزیر خارجہ محمد اسحاق ڈار نے واضح الفاظ میں کہا ہے کہ ملک میں نہ تو چینی کی ابھی کوئی قلت ہے اور نہ ہی مستقبل میں ہو گی۔انہوں نے یہ بات آج اسلام آباد میں وزیراعظم کی جانب سے ملک میں چینی کے دستیاب ذخیرے اور قیمتوں کا جائزہ لینے کیلئے تشکیل کردہ خصوصی کمیٹی کے اجلاس کی صدارت کرتے ہوئے کہی۔ اجلاس میں چینی کی ملوں کے مالکان کے تحفظات کا بھی جائزہ لیا گیا۔
اسحاق ڈار نے کہا کہ ایک ماہ کیلئے فی کلو گرام چینی کا ایکس مل ریٹ ایک سو انسٹھ روپے ہو گا جبکہ اس کی ریٹیل قیمت ایک سو چونسٹھ روپے ہو گی۔نائب وزیراعظم نے چینی کی مصنوعی قلت پیدا کرنے والوں کے خلاف سخت کارروائی کرنے کا عزم ظاہر کیا۔انہوں نے رمضان کے دو سو چوہتر سستے بازاروں میں صارفین کو فی کلوگرام چینی ایک سو تیس روپے کے نرخ پر فراہم کرنے پر چینی کی ملوں کے مالکان اور دوسری متعلقہ تجارتی تنظیموں کو سراہا۔
