اسلامی نظریاتی کونسل نے کہا ہے کہ مسلح اقدام صرف ریاست کا استحقاق ہے اور خود کش حملے شریعت کے منافی ہیں۔ اسلامی نظریاتی کونسل کا اجلاس آج منعقد ہوا جس میں کئی امور زیرغور آئے۔اجلاس کے بعد جاری اعلامیے میں کہا گیا کہ قرآن وسنت کے نظام کا نفاذ اسلامی حکومت کی بنیادی ذمہ داریوں میں شامل ہے اور کاروبارِ مملکت کو اسلام کے بتائے ہوئے اصولوں کے مطابق چلایا جائے۔
انہوں نے کہا کہ ریاست عوام کے مسائل حل اور شکایات کا ازالہ کرے، شہریوں کے جان، مال، عزت و آبرو کی حفاظت اور شہریوں کے حقوق اور تحفظ کو یقینی بنایا جائے۔اعلامیے میں احتجاج کے شرعی طریقے سے متعلق تفصیلی ضابطہ اخلاق کی منظوری بھی دی گئی۔بیان میں کہا گیا کہ آئندہ پارلیمنٹ پیغامِ پاکستان کے فتوے اور اعلامیے کو پارلیمانی تائید دلائے گی اور پارلیمان سے مؤثر قانون سازی کے حوالے سے اقدامات کی امید ہے۔ان کا کہنا تھا کہ مسلح اقدام صرف ریاست کا استحقاق ہے اور خود کش حملے شریعت کے منافی ہیں۔
