وزیراعظم شہباز شریف نے ہدایت کی ہے کہ قومی اہمیت کے تمام ترقیاتی منصوبے اعلیٰ معیار کو برقرار رکھتے ہوئے مقررہ مدت کے اندر مکمل کیے جائیں۔
یہ ہدایات انہوں نے وفاقی وزیر منصوبہ بندی و ترقی احسن اقبال سے اسلام آباد میں ملاقات کے دوران جاری کیں۔
وزیراعظم نے کہا کہ ترقیاتی منصوبوں کی بروقت تکمیل حکومت کی اولین ترجیح ہے، کیونکہ اس سے عوامی فلاح، روزگار کے مواقع اور پائیدار اقتصادی ترقی کو فروغ ملے گا۔
انہوں نے اس بات پر بھی زور دیا کہ تمام متعلقہ وزارتیں اور ادارے باہمی رابطے اور تعاون کو مزید مؤثر بنائیں تاکہ منصوبوں پر عملدرآمد کی رفتار تیز ہو اور عوام جلد از جلد ان منصوبوں کے ثمرات سے مستفید ہو سکیں۔
ملاقات کے دوران وفاقی وزیر منصوبہ بندی احسن اقبال نے وزیراعظم کو جاری ترقیاتی منصوبوں، اب تک ہونے والی پیش رفت اور آئندہ کے لائحہ عمل سے آگاہ کیا۔
اس موقع پر پبلک سیکٹر ڈویلپمنٹ پروگرام (PSDP) کے تحت جاری مختلف منصوبوں پر بھی تفصیلی تبادلۂ خیال کیا گیا۔
