پاکستان سمیت دنیا بھر میں آج یومِ شہدائے کشمیر بھرپور طریقے سے منایا جا رہا ہے، اس موقع پر ترجمان دفترِخارجہ نے کہا ہے کہ 22 کشمیری شہداء کو خراجِ عقیدت پیش کرتے ہیں۔
انہوں نے کہا کہ آج بھی 9 لاکھ بھارتی افواج جموں و کشمیر پر قابض ہے، جن کے خلاف کشمیری آج بھی جدوجہد کر رہے ہیں، ہم لائن آف کنٹرول کے دونوں اطرف کشمیری بھائیوں سے اظہارِ یکجہتی کرتے ہیں۔
ترجمان دفترِ خارجہ نے کہا کہ بھارت کا 5 اگست2019ء کا اقدام کشمیری عوام سے شناخت چھین کر کشمیریوں کو اپنی ہی سر زمین پر اقلیت میں بدلنے کی ایک اور کوشش ہے، اس کے بعد سے اب تک 640 سے زائد کشمیری ماورائے عدالت قتل ہو چکے ہیں۔
رواں سال 120 کشمیریوں کو سردی میں شہید کیا گیا، 2020ء میں بھارت نے یومِ شہدائے کشمیر پر علاقائی عام تعطیل کو ختم کر دیا۔
ترجمان دفترِ خارجہ نے مطالبہ کیا ہے کہ بھارت مقبوضہ کشمیر میں ریاستی دہشت گردی کو فوری روکے، خطے میں جاری تمام انسانی حقوق کی خلاف ورزیاں بند کرے، تمام سیاسی قیدیوں کو فوری رہا کیا جائے اور مقبوضہ کشمیر سے غیرانسانی فوجی محاصرہ ختم کرے۔
