وزیراعلیٰ پنجاب مریم نواز شریف نے صوبے کے ہر ضلع میں اسٹروک مینجمنٹ سینٹر قائم کرنے کی منظوری دے دی ہے، جبکہ ہر ڈسٹرکٹ ہیڈکوارٹر (ڈی ایچ کیو) اسپتال میں نیورالوجسٹ اور پیڈیاٹرک نیورالوجسٹ کی تعیناتی کا اصولی فیصلہ بھی کر لیا گیا ہے۔
وزیراعلیٰ نے ہدایت کی کہ ہر ضلع میں ایک ڈاکٹر اور ایک نرس کو فوری طور پر تین ماہ کی خصوصی اسٹروک مینجمنٹ تربیت فراہم کی جائے تاکہ فالج کے مریضوں کو بروقت اور معیاری علاج میسر آ سکے۔
مریم نواز شریف نے فالج کے مریضوں کے فوری علاج کے لیے ٹیلی میڈیسن منصوبہ فی الفور شروع کرنے کا حکم دیتے ہوئے کہا کہ ضلعی اسپتالوں کے ڈاکٹرز ماہرین اور کنسلٹنٹس سے براہِ راست ٹیلی فونک رابطہ کر سکیں گے، جس سے قیمتی وقت بچایا جا سکے گا۔
وزیراعلیٰ نے اسٹروک مینجمنٹ سینٹرز کے لیے نرسز کی تربیتی پروگرام شروع کرنے اور فالج کے علاج سے متعلق مؤثر عوامی آگاہی مہم چلانے کی بھی ہدایت کی۔ انہوں نے کہا کہ فالج کے علاج میں گولڈن آورز کی اہمیت تسلیم شدہ ہے اور اس حوالے سے آگاہی مہم کی وہ خود قیادت کریں گی۔
انہوں نے مزید کہا کہ پنجاب کے ہر چلڈرن اسپتال میں بھی اسٹروک مینجمنٹ سینٹر قائم کیے جائیں گے تاکہ کسی بھی مریض کو علاج کے لیے بڑے شہروں کا رخ نہ کرنا پڑے۔
خصوصی اجلاس کے دوران پمز کے نیورالوجسٹ ڈاکٹر قاسم بشیر نے وزیراعلیٰ کو اسٹروک مینجمنٹ پروگرام پر بریفنگ دی۔ اجلاس کو بتایا گیا کہ 25 سال سے زائد عمر کے ہر چار میں سے ایک فرد کو فالج کا خطرہ لاحق ہوتا ہے، جبکہ فالج کے پری ہاسپٹل، ہاسپٹل اور پوسٹ ہاسپٹل کیئر کے لیے آگاہی اور تربیت نہایت ضروری ہے۔
