نائب وزیراعظم و وزیر خارجہ سینیٹر محمد اسحاق ڈارنے قائداعظم محمد علی جناح کے یوم پیدائش اور کرسمس 2025 کے موقع پر اپنے خصوصی پیغام میں کہا ہے کہ آج پاکستان بانی پاکستان کا یومِ پیدائش منانے کے ساتھ ساتھ اپنے مسیحی ہم وطنوں کے ساتھ خوشیوں کا تہوار کرسمس بھی منا رہا ہے، جو اس جامع وژن اور اخلاقی بنیادوں کی عکاسی کرتا ہے جن پر پاکستان قائم ہوا۔
اسحاق ڈار نے کہا کہ قائدِ اعظم محمد علی جناح نہ صرف پاکستان کے معمار تھے بلکہ غیر متزلزل اصولوں اور غیر معمولی بصیرت کے حامل ایک عظیم مدبر بھی تھے۔ انہوں نے پاکستان کو ایک ایسی جمہوری ریاست کے طور پر دیکھا جہاں مساوات، تکثیریت اور تمام شہریوں کے بنیادی حقوق کا احترام بلا امتیاز مذہب، رنگ و نسل یقینی بنایا جائے۔
انہوں نے قائدِ اعظم کی 11 اگست 1947 کی تاریخی تقریر کا حوالہ دیتے ہوئے کہا کہ ریاست کسی شہری کے درمیان کوئی فرق روا نہیں رکھے گی، جب کہ اقلیتوں کے حقوق، مساوات اور مذہبی آزادی کا تحفظ پاکستان کے آئین اور قومی تشخص کا بنیادی ستون ہے۔
نائب وزیرِ اعظم نے مسیحی ہم وطنوں کو کرسمس کی دلی مبارکباد پیش کرتے ہوئے مذہبی آزادی، مساوات اور تکثیریت کے لیے پاکستان کے غیر متزلزل عزم کا اعادہ کیا۔ انہوں نے کہا کہ مسیحی برادری نے تعلیم، صحت، عوامی خدمت اور قومی دفاع سمیت مختلف شعبوں میں پاکستان کی تعمیر و ترقی میں گراں قدر خدمات انجام دی ہیں۔
اسحاق ڈار نے کہا کہ کرسمس امن، ہمدردی، قربانی اور انسانیت سے محبت جیسی آفاقی اقدار کی علامت ہے، جو اسلامی تعلیمات اور قائدِ اعظم کے تصورِ پاکستان سے مکمل ہم آہنگ ہیں۔
انہوں نے کہا کہ موجودہ عالمی حالات میں، جب دنیا عدم برداشت اور تقسیم جیسے چیلنجز سے دوچار ہے، پاکستان تکثیریت، بین المذاہب ہم آہنگی اور پرامن بقائے باہمی کے اپنے عزم کا اعادہ کرتا ہے۔
آخر میں نائب وزیرِ اعظم نے دنیا بھر کی مسیحی برادری کو ایک مرتبہ پھر کرسمس کی مبارکباد پیش کی، قائدِ اعظم محمد علی جناح کو زبردست خراجِ عقیدت پیش کیا اور کہا کہ امن، خیر سگالی اور باہمی احترام کا یہ پیغام آگے بڑھاتے رہنا ہم سب کی مشترکہ ذمہ داری ہے۔
