وزیراعظم محمد شہباز شریف سے بنگلہ دیش کے مشیر برائے مذہبی امور ڈاکٹر اے ایف ایم خالد حسین نے ملاقات کی، اس موقع پر پاکستان میں بنگلہ دیش کے ہائی کمشنر محمد اقبال حسین خان بھی موجود تھے۔ وزیراعظم نے مہمانوں کا خیرمقدم کیا اور دونوں ممالک کے درمیان تاریخی، ثقافتی اور مشترکہ عقیدتی تعلقات پر زور دیا۔
وزیراعظم نے عوامی رابطوں، علمی تبادلوں، تجارتی اور اقتصادی تعاون میں بہتری پر اطمینان کا اظہار کیا اور تعلقات کو مزید مستحکم بنانے کی ضرورت پر زور دیا۔ نیویارک اور قاہرہ میں ہونے والی ملاقاتوں کا حوالہ دیتے ہوئے وزیراعظم نے پروفیسر محمد یونس کی قیادت اور غربت کے خاتمے میں ان کے کردار کو سراہا۔
ڈاکٹر خالد حسین نے پاکستان میں سیلاب سے ہونے والے جانی و مالی نقصان پر تعزیت کا اظہار کرتے ہوئے امداد کی پیشکش کی اور چیف ایڈوائزر پروفیسر محمد یونس کا ایک خط وزیراعظم کو حوالے کیا۔ ملاقات میں پاکستان اور بنگلہ دیش کے درمیان براہ راست پروازوں کی بحالی پر بھی تبادلہ خیال کیا گیا۔
وزیراعظم نے دونوں ممالک کے اعلیٰ سطحی دوروں کے تبادلے کو جاری رکھنے کی امید ظاہر کی اور چیف ایڈوائزر کو پاکستان کا سرکاری دورہ کرنے کی دعوت دی، جبکہ بنگلہ دیشی مشیر نے وزیراعظم کو بنگلہ دیش کے دورے کی دعوت دی۔
