چیئرمین پاکستان پیپلزپارٹی بلاول بھٹو زرداری نے کہا ہے کہ جنگ کے دوران عالمی سطح پر پاکستان اور بھارتی میڈیا آمنے سامنے تھے، بھارتی جارحیت پر پاکستانی میڈیا نے بہترین کردار ادا کیا، پی ایف یو جے نے آزادی صحافت کے لیے تحریک چلائی۔کراچی میں پاکستان فیڈرل یونین آف جرنلسٹس ( پی ایف یو جے) کے 75 سال مکمل ہونے پر فیڈرل ایگزیکٹو کمیٹی کے اراکین کے اعزاز میں وزیراعلی ہاؤس سندھ میں دیے گئے عشائیے سے خطاب کرتے ہوئے بلاول بھٹو زرداری نے کہا کہ پی ایف یو جے نے آزادی صحافت کیلئے تحریک چلائی۔
انہوں نے کہا کہ بےنظیربھٹو شہید تحریک میں صحافیوں کے ساتھ کھڑی رہیں، تحریک بحالی جمہوریت ( ایم آر ڈی) میں صحافیوں نے بھی جدوجہد کی، آج بھی آزادی صحافت سے متعلق چیلنجز ہیں۔بلاول بھٹو کا کہنا تھا کہ بھارتی جارحیت کے دوران عالمی سطح پر پاکستان اور بھارتی میڈیا آمنے سامنے تھے، بھارتی جارحیت پر پاکستانی میڈیا سے بہترین کردار ادا کیا۔انہوں نے کہا کہ ڈس اور مس انفارمیشن ہتھیار بن چکا، جسے بھارت نے استعمال کیا، انہوں نے کہا کہ کشمیر پر پڑوسی ممالک پروپیگنڈا کرتے ہیں۔
چیئرمین پیپلزپارٹی نے کہا کہ جنگ سے پہلے ڈیجیٹل میڈیا پر پابندی تھی، پھر پتاچلا کہ یہ بہترین ہتھیار ہے، حکومت نے بھارت سے جنگ کے بعد ڈیجیٹل میڈیا سے پابندی ہٹائی تھی۔انہوں نےکہا کہ پیپلزپارٹی آزادی اظہار رائے پر یقین رکھتی ہے، صحافیوں کے تحفظ کے لیے قانون سازی ہونی چاہیے۔بلاول بھٹو زرداری نے کہا کہ سندھ میں سیلاب متاثرین کیلئے2 1 لاکھ گھر بنا رہے ہیں، ہم گھر بناکر خواتین کو مالکانہ حقوق دے رہے ہیں۔
