قوم آج (اتوار) یوم پاکستان اس عہد کی تجدید کے ساتھ منا رہی ہے کہ قائداعظم محمد علی جناح کے وژن کے مطابق ملک کو ایک حقیقی اسلامی اور فلاحی ریاست میں تبدیل کیا جائے گا۔یہ دن 23 مارچ 1940 کو منظور ہونے والی تاریخی قرارداد لاہور کی یاد میں منایا جاتا ہے، جس کے تحت برصغیر کے مسلمانوں نے اپنے لیے علیحدہ وطن کا ایجنڈا طے کیا۔
دن کا آغاز وفاقی دارالحکومت میں اکتیس اور صوبائی دارالحکومتوں میں اکیس توپوں کی سلامی سے ہوا۔مساجد میں نماز فجر کے بعد ملکی ترقی و خوشحالی کے لیے خصوصی دعائیں کی گئیں۔اس دن کی خصوصی تقریب ایوان صدر میں منعقد ہوئی جو رمضان المبارک کی وجہ سے محدود پیمانے پر تھی۔صدر آصف علی زرداری نے جو اس موقع پر مہمان خصوصی تھے’ اپنے خطاب میں کہا کہ مادر وطن کے تحفظ اور آزادی کی حفاظت کے لئے کسی قربانی سے دریغ نہیں کریں گے۔انہوں نے کہا کہ ہم اندرونی اور بیرونی خطرات’فتنہ الخوارج اور دہشت گردوں کے ناپاک عزائم کو خاک میں ملا دیں گے۔
تینوں مسلح افواج کے چاق و چوبند دستوں نے پریڈ میں حصہ لیا جبکہ پاک فضائیہ کے لڑاکا طیاروں نے فلائی پاسٹ کا مظاہرہ کیا۔ریڈیو پاکستان اور پی ٹی وی اس دن کی اہمیت کو اجاگر کرنے اور تحریک پاکستان کے رہنماؤں اور کارکنوں کو خراج تحسین پیش کرنے کے لیے خصوصی پروگرام نشر کر رہے ہیں۔
