بولان میں دہشت گردی کا نشانہ بننے والی جعفر ایکسپریس کی بوگیاں 8 روز بعد کوئٹہ پہنچا دی گئیں، تباہ حال کوچز سے 3 دستی بم برآمد ہوگئے جنہیں ناکارہ بنا دیا گیا۔ریلوے حکام کے مطابق کوئٹہ منتقل کی گئی بوگیوں پر گولیوں کے نشان اور بیشتر کھڑکیوں کے شیشے ٹوٹے ہوئے ہیں، بوگیوں کو مرمت کے بعد سفر کے قابل بنا کر فعال کیا جائے گا۔
ریلوے پولیس حکام کا کہنا ہے کہ کوئٹہ لائی گئی جعفر ایکسپریس کی تباہ حال کوچز سے 3 دستی بم ملے ہیں جنہیں ناکارہ بنا دیا گیا، کچھی کے علاقے مشکاف سے جعفر ایکسپریس کی متاثرہ بوگیوں کو کوئٹہ لایا گیا تھا۔واضح رہے کہ 11 مارچ کو بولان میں جعفر ایکسپریس پر دہشت گردوں نے حملہ کیا تھا، جس میں متعدد شہری اور اہلکار شہید ہوگئے تھے، جس کے بعد فورسز نے ایکشن لیتے ہوئے ہائی جیک کی گئی ٹرین اور مسافروں کو بحفاظت بازیاب کرالیا تھا، اس آپریشن میں 50 کے قریب دہشتگرد مارے گئے تھے۔
