وزیراعلیٰ پنجاب مریم نواز شریف نے پاکستان میں انٹرنیشنل کرکٹ کی بحالی پر اظہار تشکر کیا ہے۔اپنے ایک بیان میں وزیراعلیٰ مریم نواز نے ملک میں کرکٹ ٹیموں کی آمد اور سہ ملکی ٹورنامنٹ کے آغاز پر اظہار تشکر کیا اور کہا کہ کئی دہائیوں کے بعد پاکستان میں غیر ملکی کرکٹ سیریز کے انعقاد کا خیر مقدم کرتے ہیں۔انہوں نے سہ ملکی کرکٹ ٹورنامنٹ کے آغاز پر وزیراعظم شہبازشریف، چیئرمین پی سی بی محسن نقوی، پوری ٹیم اور شائقین کرکٹ کو مبارکباد دی اور پاکستان، نیوزی لینڈ اور جنوبی افریقہ کی ٹیموں کے لئے نیک تمناؤں کا اظہار کیا۔وزیراعلیٰ پنجاب کا کہنا تھا کہ کھیل کے میدان آباد کرنے کے عزم کی جیت ہے، کرکٹر کو قذافی سٹیڈیم میں دیکھ کر ہونے والی خوشی بیان نہیں کرسکتی، اللہ تعالیٰ کے فضل وکرم سے کرکٹ کے میدانوں کی رونقیں لوٹ رہی ہیں۔مریم نواز شریف نے کہا کہ کھیل اور میلے پنجاب کی ثقافتی پہچان ہیں، بحالی دیکھ کر خوشی ہوئی، کھیل انسان کو صلاحیتوں کے اظہار کے بھرپور مواقع فراہم کرتے ہیں۔
