بھارتی سپریم کورٹ نے دُہرے قتل کیس میں لوک سبھا کے سابق ممبر کو عمر قید کی سزا سنادی۔ میڈیا کے مطابق سپریم کورٹ نے جمعہ کے روز پربھوناتھ سنگھ کے خلاف قتل کیس کا فیصلہ سنایا اورجرم ثابت ہونے پر انہیں عمر قید کی سزا سنائی۔ میڈیا کے مطابق راشتریا جنتا دل کے سابق ممبر پر 1995 میں دو افراد کو قتل کرنے کے الزام میں مقدمہ درج کیا گیا جس میں کہا گیا تھا کہ پربھوناتھ سنگھ نے 1995 کے الیکشن میں مخالف امیدوار کو ووٹ دینے پر دو افراد پر فائرنگ کی تھی جس سے وہ ہلاک ہوگئے تھے۔ میڈیا کا کہنا ہےکہ سپریم کورٹ کے دو رکنی بینچ نے 18 اگست کو سیکشن 302 اور 307 کے تحت ملزم پر فرد جرم عائد کی تھی جس پر عدالت نے فیصلہ سنایا۔عدالت نے اپنے فیصلے میں بہار کی ریاستی حکومت کو متاثرہ خاندان کو 10 لاکھ روپے ادا کرنے کا بھی حکم دیا ہے۔ میڈیا کے مطابق پربھوناتھ سنگھ تین مرتبہ لوک سبھا کے ممبر رہ چکے ہیں۔
