پاکستان نے حالیہ تباہ کن سیلاب اور لینڈ سلائیڈنگ کے بعد امدادی سرگرمیوں میں معاونت کی غرض سے نیپال کیلئے انسانی ہمدردی کی بنیاد پر ایک سو ٹن انسانی امداد روانہ کی ہے۔
وزیراعظم شہباز شریف کی ہدایات پر قومی ہنگامی امدادی ادارے کے تعاون سے یہ انسانی امداد خصوصی پرواز کے ذریعے اسلام آباد سے کھٹمنڈو روانہ کی گئی۔
امدادی سامان میں متاثرہ آبادیوں کے لیے خیمے، کمبل، چٹائیاں، حفظانِ صحت کی کٹس اور ادویات شامل ہیں۔
اسلام آباد انٹرنیشنل ایئرپورٹ پر امدادی سامان روانہ کرنے کی تقریب منعقد ہوئی۔
وزیر پارلیمانی امور ڈاکٹر طارق فضل چوہدری نے تقریب میں بطور مہمان خصوصی شرکت کی۔ پاکستان میں نیپال کے سفیر اور وزارت خارجہ، این ڈی ایم اے اور دیگر متعلقہ اداروں کے سینئر حکام بھی تقریب میں موجود تھے۔
یہ امداد مشکل وقت میں نیپال کی حکومت اور عوامِ کیساتھ پاکستان کی یکجہتی کی عکاسی کرتی ہے۔
