پاکستان ایئر فورس کا دستہ، جس میں ایف-16 بلاک-52 لڑاکا طیارے، فضائی اور زمینی عملہ شامل ہے، کنگ عبدالعزیز ایئر بیس سعودی عرب پہنچ گیا ہے، جہاں وہ کثیر القومی فضائی جنگی مشق اسپیئرز آف وکٹری-2026 میں شرکت کرے گا۔
اس مشق میں سعودی عرب، پاکستان، فرانس، اٹلی، یونان، قطر، بحرین، اردن، برطانیہ اور امریکہ کے لڑاکا طیارے اور جنگی معاون عناصر شریک ہیں۔
یہ مشق شراکت دار فضائی افواج کے درمیان باہمی ہم آہنگی، عملی اشتراک، باہمی فہم اور صلاحیتوں میں اضافے کے لیے ایک مضبوط پلیٹ فارم فراہم کرتی ہے، خصوصاً بڑے فضائی آپریشنز، رات کے مشترکہ فضائی مشن، مربوط آئی ایس آر اور جدید الیکٹرانک وارفیئر ماحول میں آپریشنز کے حوالے سے۔
اس کثیر القومی فورم میں شرکت کے ذریعے پاک فضائیہ شراکت دار فضائی افواج کے ساتھ عملی ہم آہنگی کو فروغ دینے اور ٹیکنالوجی سے بھرپور جنگی ماحول میں اپنی عملی تیاری کو جانچنے کی کوشش کر رہی ہے۔
اس بین الاقوامی تعیناتی کے لیے پاک فضائیہ کے لڑاکا طیاروں نے پاکستان سے سعودی عرب تک نان اسٹاپ پرواز کی، جو پاک فضائیہ کی طویل فاصلے تک آپریشنل صلاحیت اور مہماتی قابلیت کا مظہر ہے۔
مشق کے دوران جدید ایویانکس اور بیونڈ ویژول رینج صلاحیتوں سے لیس ایف-16 بلاک-52 طیارے اڑانے والے پاک فضائیہ کے پائلٹس، دیگر ممالک کے جدید لڑاکا طیارے اڑانے والے عملے کے مدمقابل ہوں گے۔
آئی ایس پی آر کے مطابق اس مشق میں پاک فضائیہ کی شرکت نہ صرف علاقائی اور عالمی فوجی تعاون کے لیے اس کے مضبوط عزم کی عکاس ہے بلکہ اس کی پیشہ ورانہ مہارت اور مختلف و مشکل آپریشنل ماحول میں مؤثر انداز میں کام کرنے کی ثابت شدہ صلاحیت کو بھی اجاگر کرتی ہے۔
