وزیراعظم محمد شہباز شریف نے آئندہ پانچ سال میں زرعی برآمدات بڑھانے کیلئے لائحہ عمل تشکیل دینے کی ہدایت کی ہے۔وہ آج (منگل) اسلام آباد میں زرعی اصلاحات پر ورکنگ گروپ کے اجلاس کی صدارت کر رہے تھے۔وزیراعظم نے کہا کہ زرعی شعبے کی اصلاحات اور کسانوں کو عالمی سطح پر رائج اطوار سے متعارف کرانا حکومت کی اولین ترجیح ہے۔انہوں نے کہا کہ وفاقی حکومت زرعی شعبے میں اپنے دائرہ کار میں اصلاحات کے ساتھ ساتھ صوبائی حکومتوں کے ساتھ مل کر زراعت کی ترقی کیلئے اقدامات کر رہی ہے۔ فی ایکڑ پیداوار میں اضافے کیلئے کسانوں کو معیاری بیج، مناسب قیمت پر بروقت کھاد اور بیماری کی روک تھام کیلئے ادویات کی فراہمی کیلئے اقدامات کئے جا رہے ہیں۔شہباز شریف نے کہا کہ زرعی اجناس کی پراسیسنگ سے برآمدات کے قابل اشیاء کی تیاری کیلئے پالیسی سطح پر اقدامات کئے جارہے ہیں۔وزیراعظم نے بتایا کہ حال ہی میں ایک ہزار پاکستانی طلباء و طالبات کو زراعت کی جدید ٹیکنالوجی کی تربیت کیلئے سرکاری خرچ پر چین بھیجا گیا۔انہوں نے کہا کہ موجودہ وسائل میں رہتے ہوئے زراعت کی ترقی کیلئے تحقیق پر سرمایہ کاری کی جارہی ہے تاکہ فی ایکڑ پیداوار میں اضافہ ہوسکے۔شہبازشریف نے کہا کہ ماہی گیری اور پھلوں اور ان سے تیار کردہ مصنوعات کی برآمدات میں اضافے کیلئے اقدامات کئے جارہے ہیں۔انہوں نے کہا کہ ساحلی پٹی پر پام آئل کی پیداوار کیلئے پالیسی اقدامات کئے جانے چاہئیں۔
