وفاقی آئینی عدالت (ایف سی سی) نے ارشد شریف قتل کیس کی سماعت کے لیے تاریخ مقرر کر دی، جہاں قتل کی آزادانہ تحقیقات سے متعلق درخواست سنی جائے گی۔ معروف صحافی ارشد شریف کو اکتوبر 2022 میں کینیا کی پولیس نے ان کی گاڑی پر فائرنگ کے دوران سر میں گولی مار کر قتل کر دیا تھا۔وہ اگست 2022 میں پاکستان سے روانہ ہوئے تھے، جب اُن کے خلاف مختلف شہروں میں متعدد بغاوت کے مقدمات درج کیے گئے تھے۔
یہ ازخود نوٹس کیس سپریم کورٹ کے جسٹس امین الدین خان کی سربراہی میں 6 رکنی آئینی بینچ نے سنا تھا۔تاہم 27ویں ترمیم کے بعد اور وفاقی آئینی عدالت کے قیام کے ساتھ ہی اسے آئینی اور ازخود نوٹس دونوں نوعیت کے مقدمات کا اختیار دے دیا گیا تھا۔
جاری ہونے والی ایف سی سی کی کاز لسٹ کے مطابق اس کیس کی سماعت 3 دسمبر کو مقرر کی گئی ہے، جس میں اٹارنی جنرل پاکستان (اے جی پی)، اسلام آباد کے انسپکٹر جنرل پولیس (آئی جی پی)، اور سیکریٹری خارجہ سمیت دیگر فریقین کو فہرست میں شامل کیا گیا ہے۔یہ کیس جسٹس عامر فاروق اور جسٹس روزی خان بڑیچ پر مشتمل 2 رکنی بینچ سنے گا، جو کینیا میں معروف صحافی ارشد شریف کے قتل کی آزاد اور شفاف تحقیقات سے متعلق ہے۔
