اسپیشل کمیونیکیشن آرگنائزیشن (ایس سی او) نے آزاد جموں و کشمیر اور گلگت بلتستان میں 100 جدید آئی ٹی مراکز قائم کر کے ڈیجیٹل انقلاب کی بنیاد رکھ دی ہے۔ ایس سی او کے منصوبوں سے مظفرآباد، باغ، بھمبر، ڈڈیال، کوٹلی، میرپور، راولاکوٹ اور ہجیرہ کے نوجوان براہِ راست مستفید ہو رہے ہیں۔
سافٹ ویئر ٹیکنالوجی پارکس اور فری لانسنگ ہب نوجوانوں کی معاشی اور ٹیکنالوجیکل خودمختاری کے لیے اہم ہیں۔ 49 دور دراز علاقوں میں قائم فری لانسنگ ہب روزگار اور ہنر کے نئے مواقع فراہم کر رہے ہیں۔ مظفرآباد میں پاکستان کا پہلا خواتین سافٹ ویئر ٹیکنالوجی پارک اور خصوصی افراد کے لیے فری لانسنگ ہب نوجوانوں اور خصوصی افراد کے بااختیار ہونے کی علامت ہیں۔
ایس سی او منصوبوں سے 400 سے زائد نوجوان مستفید ہو رہے ہیں جبکہ 500 سے زیادہ کامیاب فری لانسرز ملکی معیشت کو مضبوط بنانے میں حصہ لے رہے ہیں۔ ان منصوبوں سے 20 ملین ڈالر کی آمدن حاصل ہوئی ہے، جو پاکستان کی **ڈیجیٹل خود انحصاری** کے نئے دور کی نشاندہی کرتی ہے۔
