پاکستان کے سفیر برائے امریکہ رضوان سعید شیخ نے پاک-یو ایس جوائنٹ بزنس کانفرنس اور ایکسپو 2025 کا افتتاح کیا اور دونوں ممالک کے درمیان پائیدار شراکت داری کے لیے اقتصادی تعاون کے اہم کردار پر زور دیا۔یہ تقریب برین ڈیزائنر پاکستان اور راولپنڈی چیمبر آف سمال ٹریڈرز اینڈ سمال انڈسٹریز کے تعاون سے، اور یو ایس پاکستان انٹرنیشنل چیمبر آف کامرس (USPICC) کے اشتراک سے منعقد ہوئی، جس میں کاروباری رہنما، تاجروں اور سرمایہ کاروں نے تجارت، سرمایہ کاری اور تجارتی مواقع پر تبادلہ خیال کیا۔اپنے کلیدی خطاب میں سفیر رضوان شیخ نے امریکی مارکیٹ میں پاکستانی کاروبار کے وسیع مواقع کو اجاگر کیا اور اس متحرک معیشت میں کامیابی کے لیے اسٹریٹجک اقدامات کی ضرورت پر زور دیا۔ انہوں نے پاکستانی کمیونٹی اور مقامی ایسوسی ایشنز کی کاوشوں کو سراہتے ہوئے اس تقریب کو دونوں ممالک کے دیرپا تعلقات کے لیے ایک اہم آغاز قرار دیا۔
سفیر نے کہا کہ پاکستان اور امریکہ کے تعلقات کی بنیاد اقتصادی، تجارتی اور سرمایہ کاری کے روابط ہیں جو درست بنیادیں رکھنے کی صورت میں نسلوں تک قائم رہ سکتے ہیں۔ انہوں نے اس کانفرنس کو "بیج بوتنے کی مشق” قرار دیا جو مستقبل میں پائیدار تعلقات کی صورت اختیار کرے گی۔انہوں نے امریکی مارکیٹ کی دنیا کی سب سے بڑی صارف مارکیٹ کے طور پر اہمیت پر زور دیا اور پاکستانی کاروباری افراد کو رسمی کاروباری طریقے اپنانے، شراکت داری قائم کرنے اور وسائل کو مشترکہ طور پر استعمال کرنے کی ترغیب دی تاکہ امریکی معیشت کے مطالبات کو پورا کیا جا سکے۔ سفیر نے اس بات کا بھی اعادہ کیا کہ سفارتخانہ شرکاء کی مدد اور ان کے کاروباری ماڈلز کو امریکی معیار کے مطابق بہتر بنانے کے لیے پرعزم ہے۔
اس دن بھر کی تقریب میں سیاحت، ریئل اسٹیٹ، ٹیکسٹائل، فرنیچر، چمڑے کی مصنوعات، دواسازی اور آئی ٹی سمیت مختلف شعبوں کی پاکستانی کمپنیوں نے شرکت کی تاکہ کاروباری مواقع تلاش کیے جائیں اور پاکستان اور امریکہ کے درمیان اقتصادی روابط مضبوط ہوں۔کانفرنس میں برین ڈیزائنر کے سی ای او محمد راؤف راجہ، یو ایس پی آئی سی سی کے چیئرمین محمد صدیق شیخ، راولپنڈی چیمبر آف سمال ٹریڈرز اینڈ سمال انڈسٹریز کے صدر سردار ثاقب نسیم اور پرنس ولیم کاؤنٹی کے اوککوائن ٹاؤن کے میئر ارنی پورٹا نے بھی خطاب کیا۔سفیر نے مختلف اسٹالز کا دورہ کیا اور کاروباری کمیونٹی سے ملاقات کی۔ انہوں نے منتظمین کا شکریہ ادا کیا اور کہا کہ یہ اقدام خاص طور پر چھوٹے تاجروں اور کاروباری کمیونٹی کے لیے امریکی مارکیٹ میں اپنی موجودگی بڑھانے کے حوالے سے مثبت ہے۔
