وزیراعظم محمد شہباز شریف سے قطر کے وزیرِ تجارت و صنعت شیخ فیصل بن ثانی بن فیصل الثانی نے ملاقات کی۔قطری وزیر پاکستان اور قطر کے درمیان مشترکہ وزارتی کمیشن کے چھٹے اجلاس کی مشترکہ صدارت کے لیے پاکستان کے دورے پر ہیں۔ملاقات میں وزیراعظم نے پاکستان قطر تعلقات کی مثبت سمت پر اطمینان کا اظہار کرتے ہوئے کہا کہ دونوں ممالک کے تعلقات مشترکہ عقائد، اقدار اور باہمی احترام پر مبنی ہیں۔ انہوں نے قطر کو پاکستان کا اہم شراکت دار اور بااثر علاقائی ثالث قرار دیا۔
وزیراعظم نے توانائی، زراعت، غذائی تحفظ، انفارمیشن ٹیکنالوجی، سیاحت اور بنیادی ڈھانچے کی ترقی کے شعبوں میں تعاون بڑھانے پر زور دیا۔ انہوں نے قطری سرمایہ کاروں کو حکومت کے خصوصی سرمایہ کاری سہولت کونسل فریم ورک کے تحت سرمایہ کاری کے مواقع سے فائدہ اٹھانے کی دعوت دی۔
شیخ فیصل بن ثانی بن فیصل الثانی نے قطری قیادت کی نیک خواہشات پہنچائیں اور پاکستان کے ساتھ اقتصادی تعلقات مزید گہرے کرنے کے عزم کا اعادہ کیا۔انہوں نے کہا کہ جے ایم سی کا چھٹا اجلاس باہمی تعاون کے نئے راستے متعین کرنے کے لیے ایک اہم فورم ثابت ہوا ہے۔ملاقات کے اختتام پر دونوں رہنماؤں نے علاقائی و عالمی فورمز پر تعاون جاری رکھنے اور کاروباری روابط کو مزید فروغ دینے پر اتفاق کیا۔
