چیف آف آرمی اسٹاف فیلڈ مارشل سید عاصم منیر عرب جمہوریہ مصر کے سرکاری دورے پر ہیں، جہاں ان کا مقصد پاکستان اور مصر کے درمیان عسکری تعاون اور دفاعی شراکت داری کو مزید مضبوط بنانا ہے۔دورے کے دوران فیلڈ مارشل سید عاصم منیر نے مصر کے وزیرِ دفاع و دفاعی پیداوار جنرل عبدالمجید سقار اور مصری افواج کے چیف آف اسٹاف لیفٹیننٹ جنرل احمد خلیفہ فتحی سے ملاقاتیں کیں۔ ملاقاتوں میں باہمی دلچسپی کے امور، علاقائی سلامتی کی صورتحال اور دفاعی تعاون کے فروغ پر تفصیلی گفتگو ہوئی۔
فیلڈ مارشل سید عاصم منیر نے اس موقع پر کہا کہ مصر ایک برادر اسلامی ملک ہے، اور دونوں ممالک کے درمیان بڑھتا ہوا تعاون نہ صرف عوام کے مفاد میں ہے بلکہ خطے میں امن و استحکام کے لیے بھی اہم کردار ادا کرے گا۔وزارتِ دفاع کے دورے پر فیلڈ مارشل سید عاصم منیر کو شاندار استقبال کے ساتھ گارڈ آف آنر پیش کیا گیا۔ انہوں نے یادگارِ نامعلوم سپاہی اور سابق مصری صدر محمد انور السادات کی قبر پر پھولوں کی چادر بھی چڑھائی۔
فیلڈ مارشل سید عاصم منیر نے جامعۃ الازہر کے شیخِ اعظم احمد الطیب سے بھی ملاقات کی۔ اس موقع پر شیخِ اعظم نے امتِ مسلمہ کو درپیش چیلنجز پر اپنے خیالات کا اظہار کیا، جبکہ آرمی چیف نے انتہاپسندانہ نظریات اور اسلام کی من گھڑت تعبیرات کے خاتمے کی ضرورت پر زور دیا۔یہ دورہ پاکستان اور مصر کے درمیان دفاعی اور مذہبی تعلقات کو نئی جہت دینے کی جانب ایک اہم قدم قرار دیا جا رہا ہے۔
