پاکستان نے اسرائیل کی جانب سے غاصبانہ طور پر مقبوضہ مغربی کنارے کے حصوں، بشمول غیر قانونی اسرائیلی بستیوں پر اپنی نام نہاد "خودمختاری” کے نفاذ کی کوششوں کی شدید مذمت کی ہے۔دفتر خارجہ کی جانب سے جاری بیان میں کہا گیا ہے کہ یہ اقدامات بین الاقوامی قانون، اقوامِ متحدہ کی سلامتی کونسل کی متعلقہ قراردادوں اور فلسطینی عوام کے ناقابلِ تنسیخ حقِ خودارادیت کی کھلی خلاف ورزی ہیں۔ترجمان دفتر خارجہ نے کہا کہ اسرائیل کے ایسے اشتعال انگیز اور غیر قانونی اقدامات خطے میں امن و استحکام کی کوششوں کو نقصان پہنچا رہے ہیں۔پاکستان نے بین الاقوامی برادری سے فوری اور مؤثر کارروائی کا مطالبہ کیا ہے تاکہ ان غیر قانونی اقدامات کو روکا جا سکے اور قابض اسرائیلی افواج کو بین الاقوامی قوانین کی مسلسل خلاف ورزیوں پر جواب دہ ٹھہرایا جا سکے۔بیان میں مزید کہا گیا کہ پاکستان اپنے علاقائی و عالمی شراکت داروں کے ساتھ مل کر فلسطینی عوام کے حقوق کے تحفظ، ان کے حقِ خودارادیت اور امن، انصاف اور وقار کی فراہمی کے لیے پرعزم ہے۔دفتر خارجہ نے ایک بار پھر فلسطینی عوام کے ناقابلِ متزلزل حمایت کا اعادہ کرتے ہوئے کہا کہ پاکستان 1967ء سے قبل کی سرحدوں پر مشتمل، آزاد، خودمختار، مستحکم اور متصل ریاستِ فلسطین کے قیام کی مکمل حمایت کرتا ہے، جس کا دارالحکومت القدس الشریف ہوگا۔
