پاکستان نے غزہ میں قابض اسرائیلی افواج کی جانب سے تازہ حملوں کی شدید مذمت کی ہے، جن کے نتیجے میں بڑی تعداد میں عام شہری جاں بحق ہوئے ہیں۔بدھ کے روز جاری کردہ دفتر خارجہ کے بیان میں کہا گیا ہے کہ یہ اقدامات شرم الشیخ میں طے پانے والے امن معاہدے کی روح کے منافی ہیں، جو مسلم و عرب دنیا، امریکہ، یورپ اور اقوام متحدہ کی قیادت کی موجودگی میں طے پایا تھا۔
پاکستان نے عالمی برادری سے مطالبہ کیا ہے کہ وہ ان خلاف ورزیوں کو روکنے کے لیے فوری اور مؤثر اقدامات کرے، جنگ بندی پر مکمل عمل درآمد کو یقینی بنائے اور فلسطینی شہریوں کے تحفظ کو یقینی بنایا جائے۔پاکستان نے فلسطینی عوام کے ساتھ اپنی غیر متزلزل حمایت کا اعادہ کرتے ہوئے اسرائیلی جارحیت کے فوری خاتمے کا مطالبہ کیا ہے۔ بیان میں پاکستان کے اصولی مؤقف کو دہراتے ہوئے کہا گیا کہ ایک آزاد، خودمختار، قابلِ عمل اور متصل فلسطینی ریاست کا قیام ضروری ہے، جس کی سرحدیں جون 1967 سے پہلے والی ہوں اور القدس الشریف اس کا دارالحکومت ہو۔
