پاکستان سمیت آج دنیا بھر میں International Day of the Girl Child منایا جا رہا ہے، جس کا مقصد دنیا کی لڑکیوں کو درپیش چیلنجز کو اجاگر کرنا، ان کے انسانی حقوق کو تسلیم کرنا، اور انہیں بااختیار بنانے کی اہمیت کو اجاگر کرنا ہے۔
یہ دن اقوامِ متحدہ کے تحت ہر سال 11 اکتوبر کو منایا جاتا ہے۔ اس دن کا آغاز 2012 میں کیا گیا تھا تاکہ عالمی برادری کو لڑکیوں کے بنیادی مسائل جیسے تعلیم تک رسائی، صحت کی سہولیات، صنفی مساوات، کم عمری کی شادی، اور تشدد کے خاتمے کی طرف متوجہ کیا جا سکے۔
اقوامِ متحدہ کے مطابق، دنیا بھر میں لاکھوں لڑکیاں آج بھی بنیادی انسانی حقوق، خاص طور پر تعلیم، صحت، اور سوشل تحفظ سے محروم ہیں۔ کم عمری کی شادی، تعلیم کا فقدان، صنفی امتیاز، اور معاشی ناہمواری لڑکیوں کی ترقی کی راہ میں سب سے بڑی رکاوٹیں ہیں۔
پاکستان میں بھی لڑکیوں کو متعدد سماجی و معاشی چیلنجز کا سامنا ہے۔ یونیسف کی ایک رپورٹ کے مطابق، پاکستان میں تقریباً 22.8 ملین بچے اسکول سے باہر ہیں، جن میں بڑی تعداد لڑکیوں کی ہے۔ دیہی علاقوں میں تعلیم اور صحت تک رسائی مزید محدود ہے، جبکہ کم عمری کی شادی اور صنفی تشدد جیسے مسائل اب بھی سنجیدہ نوعیت کے ہیں۔
اقوامِ متحدہ نے اس سال International Day of the Girl Child کا موضوع رکھا ہے“Invest in Girls’ Rights: Our Leadership, Our Well-being”یعنی “لڑکیوں کے حقوق میں سرمایہ کاری: ہماری قیادت، ہماری فلاح”۔یہ تھیم اس بات پر زور دیتا ہے کہ لڑکیوں کو بااختیار بنانا صرف انفرادی سطح پر ہی نہیں بلکہ سماجی ترقی کے لیے بھی ناگزیر ہے۔
International Day of the Girl Child ہمیں یاد دلاتا ہے کہ لڑکیوں کو صرف تحفظ دینا ہی کافی نہیں، بلکہ ان کی تعلیم، صحت، فیصلہ سازی اور قیادت میں کردار کو یقینی بنانا بھی ہماری اجتماعی ذمہ داری ہے۔ حکومت، والدین، اساتذہ، اور سماجی تنظیموں کو مل کر ایسے ماحول کی تشکیل کرنی ہوگی جہاں ہر لڑکی اپنے خواب پورے کر سکے۔
