پاکستان کے قومی احتساب بیورو (نیب) اور ملائیشیا کی اینٹی کرپشن کمیشن نے بدعنوانی کی روک تھام اور خلاف ورزیوں کے خلاف مشترکہ جدوجہد کو مضبوط بنانے کے لیے مفاہمتی یادداشت (MoU) پر دستخط کیے ہیں۔یہ یادداشت نائب چیئرمین نیب سہیل ناصر اور ملائیشیا کی اینٹی کرپشن کمیشن کے چیف کمشنر جناب اعظم بن باکی نے کوالالمپور کے شہر پُتراجایا میں تبادلہ کی۔ اس موقع پر وزیراعظم شہباز شریف اور ملائیشیا کے وزیراعظم انور ابراہیم بھی موجود تھے۔
مفاہمتی یادداشت کا مقصد بدعنوانی کے خلاف باہمی تعاون، مشترکہ صلاحیتوں کی ترقی اور تکنیکی معاونت کو فروغ دینا ہے تاکہ بدعنوانی کی روک تھام اور مقابلہ بہتر طریقے سے کیا جا سکے۔دونوں ممالک کے اینٹی کرپشن اداروں کے درمیان یہ تعاون آپریشنل سرگرمیوں میں تکنیکی مدد کو بڑھانے میں معاون ثابت ہوگا۔ اس کے علاوہ، یادداشت قانون سازی میں ہونے والی تبدیلیوں اور عوامی آگاہی کے فروغ کے لیے معلومات کے تبادلے کو بھی آسان بنائے گی۔
یہ اقدام عوامی شرکت کو بڑھانے اور بدعنوانی کے خلاف مؤثر احتساب کو یقینی بنانے میں اہم کردار ادا کرے گا۔مزید برآں، انسانی وسائل کی استعداد کو پیشہ ورانہ تربیتی کورسز، تجربات کے تبادلے اور ماہرین کی شرکت کے ذریعے بہتر بنایا جائے گا۔عالمی سطح پر بدعنوانی، منی لانڈرنگ اور سرحد پار مالی جرائم کے بڑھتے ہوئے خدشات کے پیش نظر، یہ یادداشت غیر قانونی مالیاتی بہاؤ کو روکنے، قانونی فریم ورک کو مضبوط بنانے اور بین الاقوامی معاہدوں کے ساتھ ہم آہنگی کے لیے مشترکہ کوششوں کو فروغ دے گی۔
