وزیر اعظم کے معاون خصوصی برائے صنعت و پیداوار، جناب ہارون اختر خان نے ازبکستان کے فارما پارک اور ٹیکنو پارک کا دورہ کیا تاکہ دونوں ممالک کے درمیان صنعتی و تکنیکی تعاون کو فروغ دیا جا سکے۔
دورے کے دوران، جناب ہارون اختر خان نے ازبک ٹیکنو پارک میں تیار کی جانے والی جدید گھریلو اور الیکٹرانک مصنوعات کو سراہتے ہوئے انہیں "قابلِ تعریف” قرار دیا۔ انہوں نے زور دیا کہ سولر واٹر ہیٹرز کی مشترکہ تیاری نہ صرف توانائی کے شعبے میں مفید ثابت ہوگی بلکہ عوام کو سستی توانائی کی فراہمی کا ذریعہ بھی بنے گی۔
مزید برآں، توانائی اور ٹیکنالوجی کے شعبوں میں جدید گیس اور بجلی کے میٹرز کی مشترکہ تیاری پر بھی تبادلۂ خیال کیا گیا۔
فارماسیوٹیکل سیکٹر کے حوالے سے، جناب ہارون اختر خان نے اس امر پر زور دیا کہ ازبکستان میں پاکستانی ادویہ ساز اداروں کی لائسنسنگ اور سرٹیفکیشن کے عمل کو مزید مؤثر بنانے کی ضرورت ہے۔ انہوں نے کہا کہ اس شعبے کی استعداد بڑھا کر نہ صرف برآمدات میں اضافہ کیا جا سکتا ہے بلکہ عالمی معیار سے ہم آہنگی بھی ممکن ہے۔
انہوں نے کہا، "ٹیکنالوجی اور صنعت میں تعاون کے ذریعے پاکستان اور ازبکستان اپنے تعلقات کو نئی بلندیوں تک لے جا سکتے ہیں۔”
