نائب وزیر اعظم و وفاقی وزیر برائے خزانہ اسحاق ڈار نے کہا ہے کہ پاکستان کی مکمل ڈیجیٹل صلاحیت کو بروئے کار لانے کے لیے ضروری ہے کہ اصلاحاتی عمل کو عالمی بہترین طریقہ کار سے ہم آہنگ کیا جائے۔
انہوں نے ان خیالات کا اظہار آج اسلام آباد میں منعقدہ آئی ٹی اور ٹیلی کام اصلاحات سے متعلق ایک اہم اجلاس کی صدارت کرتے ہوئے کیا۔ اجلاس میں ملک میں ڈیجیٹل معیشت کے فروغ، سرمایہ کاری کے مواقع بڑھانے، اور ٹیکنالوجی کے شعبے میں ترقی کے لیے مختلف اقدامات کا جائزہ لیا گیا۔
اجلاس کے دوران کنیکٹیویٹی میں بہتری، اختراع (Innovation) کے فروغ اور سرمایہ کار دوست ماحول کی فراہمی جیسے امور پر تفصیلی تبادلہ خیال کیا گیا۔ نائب وزیر اعظم نے اس بات پر زور دیا کہ ڈیجیٹل ٹیکنالوجی کا مؤثر استعمال نہ صرف معیشت کو تقویت دے گا بلکہ نوجوانوں کے لیے روزگار کے نئے مواقع بھی پیدا کرے گا۔
انہوں نے متعلقہ اداروں کو ہدایت کی کہ اصلاحاتی عمل کو تیز کیا جائے تاکہ پاکستان عالمی ڈیجیٹل معیشت کا فعال حصہ بن سکے۔
