وزیراعظم محمد شہباز شریف نے پاکستان سٹاک مارکیٹ ہنڈرڈ انڈیکس 1 لاکھ 56 ہزار پوائنٹس کی سطح عبور کرنے پر اطمینان کا اظہار کیا ہے۔اپنے ایک بیان میں انہوں نے کہا کہ پاکستان سٹاک مارکیٹ کا تاریخی سطح عبور کرنا، کاروباری برادری اور سرمایہ کاروں کے حکومت کی پالیسیوں پر اعتماد کا مظہر ہے۔شہباز شریف نے کہا کہ اللہ کے فضل و کرم سے ملکی ترقی کا سفر معاشی ٹیم کی محنت کی وجہ سے جاری و ساری ہے۔انہوں نے کہا کہ حال ہی میں چین کے نجی شعبے کے ساتھ پاکستان کی نجی کمپنیوں کے اربوں ڈالر کے معاہدے اور مفاہمتی یادداشتوں پر دستخط ہوئے۔انہوں نے کہا کہ ملک میں سرمایہ کاری میں اضافے سے صنعتیں لگیں گی، برآمدات میں اضافہ ہوگا اور روزگار کے مزید مواقع پیدا ہوں گے۔وزیراعظم نے معیشت کو بہتری اور ترقی کی راہ پر گامزن کرنے پر اقتصادی ٹیم کی کوششوں کو سراہا۔
