پاکستان کرکٹ ٹیم اپنی آئی سی سی ورلڈ ٹیسٹ چیمپئن شپ 2025-27 کی مہم کا آغاز 12 اکتوبر سے قذافی اسٹیڈیم لاہور میں کرے گی، جہاں وہ جنوبی افریقہ کے خلاف دو ٹیسٹ میچوں کی سیریز کا پہلا میچ کھیلے گی۔ یہ مقابلہ 12 سے 16 اکتوبر تک جاری رہے گا اور یہ قذافی اسٹیڈیم میں رواں سال کی گئی مکمل تزئین و آرائش کے بعد پہلا پانچ روزہ ٹیسٹ میچ ہوگا، جسے خاص طور پر آئی سی سی چیمپئنز ٹرافی 2025 کے لیے تیار کیا گیا ہے۔
جنوبی افریقہ کی ٹیم پاکستان کا دورہ چار سال بعد کر رہی ہے۔ آخری بار وہ جنوری 2021 میں پاکستان آئی تھی، جہاں میزبان ٹیم نے انہیں دو میچوں کی ٹیسٹ سیریز میں 0-2 سے شکست دی تھی۔ موجودہ دورے کا دوسرا ٹیسٹ 20 سے 24 اکتوبر کے درمیان راولپنڈی کرکٹ اسٹیڈیم میں کھیلا جائے گا، جو ایک بار پھر دونوں ٹیموں کو تاریخی مقابلے میں مدمقابل لائے گا۔
ٹیسٹ سیریز کے بعد دونوں ٹیمیں تین ٹی ٹوئنٹی میچز کی سیریز میں حصہ لیں گی۔ پہلا میچ 28 اکتوبر کو راولپنڈی میں کھیلا جائے گا، جب کہ باقی دونوں میچز 31 اکتوبر اور یکم نومبر کو لاہور کے قذافی اسٹیڈیم میں منعقد ہوں گے۔ یہ مقابلے نہ صرف شائقین کرکٹ کو تیز رفتار فارمیٹ کا لطف دیں گے بلکہ ٹی20 ورلڈ کپ کی تیاریوں کے حوالے سے بھی اہم ثابت ہوں گے۔
اس دورے کا اختتام تین ایک روزہ بین الاقوامی میچوں پر ہوگا، جو 4 سے 8 نومبر کے دوران فیصل آباد کے تاریخی اقبال اسٹیڈیم میں کھیلے جائیں گے۔ یہ ایک یادگار موقع ہوگا کیونکہ فیصل آباد میں 17 سال بعد کوئی ون ڈے انٹرنیشنل میچ منعقد ہونے جا رہا ہے۔ آخری بار یہاں 11 اپریل 2008 کو پاکستان اور بنگلہ دیش کے درمیان ون ڈے میچ ہوا تھا، جس میں پاکستان نے سات وکٹوں سے کامیابی حاصل کی تھی۔
