پاکستان اور ترکی نے مسلم دنیا اور اس سے باہر امن، استحکام اور خوشحالی کے لیے تعاون کو مزید مضبوط بنانے کے اپنے مشترکہ عزم پر زور دیا ہے۔اس عزم کا اظہار اتوار کو چین کے شہر تیانجن میں شنگھائی تعاون تنظیم کے سربراہان مملکت کی کونسل کے موقع پر وزیراعظم شہباز شریف اور ترک صدر رجب طیب اردوان کے درمیان ہونے والی ملاقات میں کیا گیا۔
دونوں رہنماؤں نے پاک ترک تعلقات کی موجودہ صورتحال کا جائزہ لیا اور دوطرفہ تعلقات میں بڑھتی ہوئی رفتار پر اطمینان کا اظہار کیا۔ انہوں نے سیاسی، اقتصادی، دفاعی اور سلامتی کے شعبوں سمیت وسیع میدان میں اعلیٰ سطح کے تبادلوں اور تعاون میں مسلسل اضافے کو سراہا۔
ترک صدر نے پاکستان کے مختلف حصوں میں جاری سیلاب کے نتیجے میں قیمتی جانوں اور املاک کے ضیاع پر دلی تعزیت کا اظہار کیا۔ انہوں نے پاکستانی عوام کے ساتھ اپنے ملک کی یکجہتی کا اظہار بھی کیا اور کہا کہ ترک حکومت اور عوام مشکل کی اس گھڑی میں پاکستان کے ساتھ کندھے سے کندھا ملا کر کھڑے ہیں۔
دونوں فریقوں نے اہم علاقائی اور بین الاقوامی پیش رفت پر تبادلہ خیال کیا۔ انہوں نے غزہ میں بگڑتی ہوئی انسانی صورتحال پر گہری تشویش کا اظہار کیا اور فلسطینی عوام کے جائز حقوق کی وکالت کرنے اور جاری اسرائیلی جارحیت اور نسل کشی کی پالیسیوں کی مذمت کے لیے بین الاقوامی پلیٹ فارم استعمال کرنے کے لیے اپنے مشترکہ عزم کا اعادہ کیا۔
