ڈائریکٹر جنرل (ڈی جی) انٹر سروسز پبلک ریلیشن (آئی ایس پی آر) لیفٹیننٹ جنرل احمد شریف چوہدری نے کہا ہے کہ بلوچستان میں منفی پروپیگنڈے کے ذریعے عوام میں مایوسی پھیلائی جانے کی مذموم کوششیں کبھی کامیاب نہیں ہوں گی۔پاک فوج کے شعبہ تعلقات عامہ کے مطابق کونسل آف پاکستان نیوز پیپر ایڈیٹرز کے وفد نے کاظم خان کی قیادت میں ڈی جی آئی ایس پی آر لیفٹیننٹ جنرل احمد شریف چوہدری سے ملاقات کی۔
اعلامیے کے مطابق اراکین وفد نے اس موقع پر کہا کہ معرکہ حق کے دوران شاندار کارکردگی پر افواج پاکستان خراج تحسین کے حقدار ہیں، معرکہ حق کے تمام مراحل کے دوران آئی ایس پی آر نے کلیدی کردار ادا کیا اور بھارتی میڈیا کے ہیجان انگیز پروپیگنڈے کے جواب میں بروقت اور معتبر اطلاعات کی فراہمی کو یقینی بنایا۔کونسل آف پاکستان نیوز پیپر ایڈیٹرز کے وفد کا مزید کہنا تھا کہ معرکہ حق میں فقید المثال فتح پاکستانی قوم، حکومت پاکستان اور عسکری اداروں کی باہمی اور مربوط حکمت عملی کا ثمر ہے۔
اس موقع پر اعلامیے کے مطابق ڈی جی آئی ایس پی آر نے کہا کہ نوجوان اس ملک کا سرمایہ ہیں اور ان کی ملک کے بارے میں مثبت سوچ پاکستان کے روشن مستقبل کی دلیل ہے۔ان کا کہنا تھا کہ دہشت گردی کے تمام واقعات کے پیچھے بھارت کی منفی سوچ اور وسائل کار فرما ہیں، پاکستان کی افواج عوام کی تائید سے اس پراکسی جنگ کا قلع قمع کرنے کی پوری صلاحیت رکھتی ہیں۔
انہوں نے کہا کہ بلوچستان میں منفی پروپیگنڈے کے ذریعے عوام میں مایوسی پھیلائی جانے کی مذموم کوششیں کبھی کامیاب نہیں ہوں گی کیونکہ بلوچستان کے محب وطن اور غیور عوام ان ملک دشمن عناصر اور ان کے بیرونی آقاؤں کی ریشاداونیوں سے بخوبی آگاہ ہیں۔
لیفٹیننٹ جنرل احمد شریف چوہدری کا کہنا تھا کہ میڈیا نے پاکستان کو درپیش مسائل اور چیلنجز میں ہمیشہ ایک ذمہ دارانہ اور مثبت کردار ادا کیا، معرکہ حق کے دوران پاکستانی میڈیا نے نہ صرف ذمہ دارانہ اور اعلیٰ صحافتی اقدار کا مظاہرہ کیا بلکہ بھارتی میڈیا کے منفی پروپیگنڈے کا انتہائی مؤثر جواب دیا۔اعلامیے کے مطابق آخر میں وفد نے ڈی جی آئی ایس پی آر کو یادگاری شیلڈ پیش کی۔
