وزیر اطلاعات و نشریات عطاء اللہ تارڑ نے کہا ہے کہ ملک کے مختلف حصوں میں سیلاب کی صورتحال سے نمٹنے کے لیے قومی سطح پر کوششیں جاری ہیں۔وزیر برائے موسمیاتی تبدیلی مصدق ملک اور این ڈی ایم اے کے چیئرمین لیفٹیننٹ جنرل انعام حیدر کے ہمراہ آج اسلام آباد میں میڈیا کے نمائندوں کو بریفنگ دیتے ہوئے انہوں نے کہا کہ وزیراعظم کی زیرصدارت ایک اجلاس میں خیبرپختونخوا اور گلگت بلتستان میں سیلاب کی صورتحال کا جائزہ لیا گیا۔اجلاس میں جاری راحت اور بچاؤ کاموں کا بھی جائزہ لیا گیا۔
انہوں نے کہا کہ صوبائی حکومتوں کے ساتھ کوآرڈینیشن موثر انداز میں چلائی جا رہی ہے۔
قبل از وقت وارننگ سسٹم کے ذریعے این ڈی ایم اے متعلقہ حکام کو باقاعدگی سے ڈیٹا فراہم کر رہا تھا۔عطاء اللہ تارڑ نے کہا کہ وزیراعظم کی ہدایت پر این ڈی ایم اے صوبائی حکومتوں سے رابطے میں ہے۔انہوں نے کہا کہ متاثرہ علاقوں میں امدادی سرگرمیاں جاری ہیں۔اپنے ریمارکس میں، وزیر برائے موسمیاتی تبدیلی نے کہا کہ متاثرین کو ان کے نقصانات کے ازالے کے لیے ہر ممکن کوشش کی جائے گی۔ انہوں نے صوبائی حکومتوں سے کہا کہ وہ پہاڑی علاقوں میں دریاؤں اور نالوں کے کنارے رہنے والے لوگوں کو مستقل طور پر محفوظ مقامات پر آباد کرنے کے لیے مہم چلائیں۔
چیئرمین این ڈی ایم اے نے کہا کہ اتھارٹی خیبرپختونخوا اور گلگت بلتستان کے سیلاب سے متاثرہ علاقوں میں بروقت امداد اور موثر ردعمل کو یقینی بنانے کے لیے صوبائی حکومتوں کے ساتھ مسلسل رابطے میں ہے۔تازہ ترین ہلاکتوں کی تعداد بتاتے ہوئے انہوں نے کہا کہ بارشوں، سیلاب اور لینڈ سلائیڈنگ سے اب تک چھ سو ستر افراد ہلاک اور ایک ہزار زخمی ہو چکے ہیں۔ان کا مزید کہنا تھا کہ سیلاب سے متاثرہ علاقوں میں چار سو بیس سے زائد فلڈ ریلیف کیمپوں کو فعال کر دیا گیا ہے۔
انہوں نے کہا کہ مون سون کے مزید دو سے تین سپیل متوقع ہیں اور موجودہ سپیل جمعہ تک جاری رہے گا۔ انہوں نے کہا کہ ستمبر کے آخر تک حالات معمول پر آجائیں گے۔لیفٹیننٹ جنرل انعام حیدر ملک نے کہا کہ حکومت کی اولین ترجیح لوگوں کو بچانا اور انہیں محفوظ مقامات پر منتقل کرنا ہے۔انہوں نے کہا کہ مون سون کا موسم ختم ہونے کے بعد سیلاب سے ہونے والے نقصانات کا تخمینہ لگانے کا عمل شروع کر دیا جائے گا۔
