پاکستان اور ویسٹ انڈیز کی کرکٹ ٹیمیں امریکہ میں تین ٹی ٹوئنٹی انٹرنیشنل میچوں کی سیریز میں مدمقابل ہورہی ہیں۔ تینوں میچز لاڈرہل کے براورڈ کاؤنٹی سٹیڈیم میں کھیلے جائیں گے۔
پہلا ٹی ٹوئنٹی انٹرنیشنل پاکستان کے وقت کے مطابق جمعہ کی صبح پانچ بجے شروع ہوگا۔ دوسرا میچ اتوارکی صبح پانچ بجے اور اسی طرح تیسرا میچ پیر کی صبح پانچ بجے شروع ہوگا۔ واضح رہے کہ پاکستان اور لاڈرہل کے درمیان نو گھنٹے کا فرق ہے۔
پاکستان کرکٹ ٹیم بنگلہ دیش کے خلاف ٹی ٹوئنٹی سیریز کھیل کر لاڈرہل پہنچی ہے جہاں اس نے پریکٹس سیشن کیے ہیں۔
پاکستان کرکٹ ٹیم کو بنگلہ دیش کے خلاف پہلے دو میچوں میں شکست ہوئی تھی تاہم اس نے تیسرے میچ میں74 رنز سے کامیابی حاصل کی تھی جس میں صاحبزادہ فرحان کی پانچ چھکوں اور چھ چوکوں کی مدد سے بنائی گئی63 رنز کی اننگز قابل ذکر تھی۔
ویسٹ انڈیز نے آسٹریلیا کے خلاف ٹی ٹوئنٹی سیریز کھیلی ہے جس میں اسے پانچ صفر کی شکست سے دوچار ہونا پڑا ہے۔
پاکستان ٹیم میں فاسٹ بولرز شاہین آفریدی، حارث رؤف اور حسن علی کی واپسی ہوئی ہے۔
اوپنر فخرزمان کو ٹی ٹوئنٹی انٹرنیشنل میں اپنے دو ہزار رنز مکمل کرنے کے لیے 99 رنز درکار ہیں۔
پاکستان اور ویسٹ انڈیز کے درمیان کھیلے گئے ٹی ٹوئنٹی انٹرنیشنل میچوں میں پاکستان کا پلہ بھاری رہا ہے اس نے کھیلے گئے 21 میں سے15 میچ جیتے ہیں صرف 3 میچوں میں اسے شکست ہوئی ہے جبکہ 3 میچ نتیجہ خیز ثابت نہیں ہوسکے ہیں۔
دونوں ٹیموں کے درمیان آخری ٹی ٹوئنٹی سیریز 2021 میں ویسٹ انڈیز میں کھیلی گئی تھی جو پاکستان نے ایک صفر سے جیتی تھی۔
پاکستان اور ویسٹ انڈیز کی ٹیمیں امریکہ میں ٹی ٹوئنٹی سیریز کے بعد تین ون ڈے انٹرنیشنل میچوں کی سیریز بھی کھیلیں گی ۔8 ۔10 اور 12 اگست کو یہ میچز برائن لارا اکیڈمی ٹرینڈاڈ اینڈ ٹوباگو میں کھیلے جائیں گے۔
پاکستان ٹی ٹوئنٹی ٹیم کے کپتان سلمان علی آغا کہتے ہیں:
"ہم اس شاندار وینیو پر کھیلنے کے منتظر ہیں اور ہمارا یہاں اب تک کا وقت دلچسپ رہا ہے۔ مجھے لگتا ہے کہ تین T20I بھی اچھے ہوں گے اور ایک ٹیم کے طور پر ہم میدان میں اترنے کے لیے بے صبری سے منتظر ہیں۔
"ہمارے پاس اپنے اسکواڈ میں نوجوانوں اور تجربے کا عمدہ امتزاج ہے اور یہ بہت اچھی بات ہے کہ ہم ایک اور T20I سیریز میں جا رہے ہیں کیونکہ T20 ورلڈ کپ کی تیاری میں تیزی آرہی ہے۔
"ویسٹ انڈیز ایک مضبوط T20I ٹیم ہے حالانکہ ان کے نتائج حال ہی میں ٹھیک نہیں آرہے ہیں پر اس سیریز میں ان کو ہمیں ہرانے کے لیے اپنا بہترین کھیل کھیلنا پڑے گا۔”
پاکستان ٹی ٹوئنٹی سکواڈ ان کھلاڑیوں پر مشتمل ہے۔ سلمان علی آغا ( کپتان ) ۔فخرزمان ۔ صاحبزادہ فرحان( وکٹ کیپر )۔ صائم ایوب۔ حسن نواز۔ محمد حارث ( وکٹ کیپر)۔ محمد نواز۔ خوشدل شاہ۔ حسین طلعت۔ ابرار احمد ۔شاہین آفریدی۔ حارث رؤف۔ فہیم اشرف ۔حسن علی اور سفیان مقیم ۔
