وزیر اعظم شہباز شریف نے پاکستان کرغزستان تعاون میں پیش رفت کو سراہا۔منگل کو اسلام آباد میں کابینہ کی ڈپٹی چیئرمین ایڈل بیسالوف کی قیادت میں جمہوریہ کرغزستان کے ایک اعلیٰ سطحی وفد سے گفتگو کرتے ہوئے انہوں نے پاکستان کرغزستان مشترکہ بین الحکومتی کمیشن کے 5ویں اجلاس کے کامیاب انعقاد پر اطمینان کا اظہار کیا۔
انہوں نے دونوں فریقوں کے درمیان پروٹوکول اور مفاہمت کی متعدد یادداشتوں (ایم او یوز) پر دستخط کو سراہا اور انہیں تجارت، توانائی، تعاون، روابط اور عوام سے عوام کے تبادلوں کو بڑھانے کی جانب اہم قدم قرار دیا۔وزیر اعظم نے بین الحکومتی کمیشن کے دوران کیے گئے فیصلوں پر عمل درآمد کے لیے پاکستان کے مضبوط عزم کا اعادہ کیا اور معاہدوں کو ٹھوس نتائج میں تبدیل کرنے کے لیے بروقت فالو اپ کی اہمیت پر زور دیا۔
کرغیز فریق نے قریبی دوطرفہ تعلقات کو فروغ دینے میں حکومت پاکستان کی کوششوں کو سراہا اور اس اعتماد کا اظہار کیا کہ بین الحکومتی کمیشن کے نتائج گہرے اور نتیجہ خیز تعاون کا باعث بنیں گے۔دونوں اطراف نے اپنے عوام کے باہمی فائدے کے لیے مل کر کام کرنے اور پاکستان اور کرغزستان کے مضبوط تعلقات کے لیے ہر سطح پر تعاون جاری رکھنے کے عزم کا اعادہ کیا۔
