پاکستان اور امریکہ نے معاشی شعبے میں تعلقات کو مضبوط بنانے کے لیے تمام ممکنہ راستے تلاش کرنے پر اتفاق کیا ہے۔وفاقی وزیر خزانہ سینیٹر محمد اورنگزیب کی قیادت میں پاکستانی وفد نے واشنگٹن، ڈی سی میں امریکی سیکریٹری آف کامرس ہاورڈ لٹنک اور امریکی تجارتی نمائندے جیمیسن گریئر سے تعمیری ملاقات کی۔ملاقات میں دونوں فریقین نے تجارت اور معاشی تعاون، جو پاک امریکہ دوطرفہ تعلقات کا ایک اہم ستون ہے، کو مزید وسعت دینے کے لیے اب تک ہونے والی پیش رفت پر اطمینان کا اظہار کیا۔
دونوں ممالک نے اس عزم کا اعادہ کیا کہ وہ دوطرفہ معاشی تعلقات کو مزید مضبوط بنانے کے لیے تمام ممکنہ راستے تلاش کریں گے۔وزیر خزانہ محمد اورنگزیب نے اس موقع پر کہا کہ امریکہ پاکستان کا سب سے بڑا تجارتی شراکت دار ہے اور پاکستان چاہتا ہے کہ ان تعلقات کا دائرہ کار مزید وسیع ہو۔
انہوں نے کہا کہ پاکستان ٹیکنالوجی، آئی ٹی، معدنیات، زراعت اور دیگر روایتی و غیر روایتی شعبوں میں تعاون بڑھانے کا خواہاں ہے تاکہ دونوں ملکوں کو باہمی فائدہ پہنچے۔دونوں فریقین نے امید ظاہر کی کہ پاکستان اور امریکہ کے درمیان جاری تجارتی مذاکرات ایک مثبت نتیجے پر منتج ہوں گے جس سے دونوں ممالک کی معیشتوں کو فائدہ پہنچے گا۔
