ترجمان وزیراعلیٰ خیبرپختونخوا فراز مغل نے کہا ہے کہ وزیراعلیٰ کی بانی پی ٹی آئی سے کوئی ملاقات نہیں ہوئی۔اپنے ایک بیان میں ترجمان وزیراعلیٰ خیبرپختونخوا فراز مغل کا کہنا تھا کہ وزیراعلیٰ علی امین گنڈاپور نے کسی فیصلے کی مخالفت نہیں کی، بلکہ تمام فیصلے بانی پی ٹی آئی کی منظوری سے ہوتے ہیں۔انہوں نے کہا کہ پی ٹی آئی آئین و قانون کی پابند جماعت ہے، سینیٹ ٹکٹ کا فیصلہ صرف چیئرمین کا اختیار ہے جن کی جانب سے کی جانے والی نامزدگیاں ہی حتمی تصور کی جائیں گی۔
فراز مغل کا کہنا تھا کہ علیمہ باجی یا وزیراعلیٰ خیبرپختونخوا کے درمیان اختلافات کی خبریں جھوٹی اور بے بنیاد ہیں، وزیراعلیٰ بانی پی ٹی آئی کی جانب سے دی گئی تمام ہدایات پر من و عن عمل کرتے ہیں اور پارٹی قیادت کے فیصلوں کے پابند ہیں۔ترجمان نے کارکنان سے اپیل کی کہ وہ افواہوں پر کان نہ دھریں اور صرف پارٹی قیادت پر مکمل اعتماد رکھیں۔
