صدرِ مملکت آصف علی زرداری اور وزیرِ اعظم شہباز شریف کے درمیان اہم ملاقات ہوئی۔ایوانِ صدر میں ہونے والے ملاقات میں ملکی سیاسی، معاشی اور سکیورٹی صورتحال پر تفصیلی تبادلہ خیال کیا گیا۔وزیر اعظم شہباز شریف نے صدر مملکت آصف علی زرداری کو معیشت کے استحکام کے لیے حکومت کے فیصلوں، اصلاحات اور عوامی فلاحی اقدامات سے آگاہ کیا۔
ایوان صدر کے اعلامیے کے مطابق ملاقات میں وفاقی وزرا خواجہ محمد آصف ،احسن اقبال، اعظم نذیر تارڑ، محسن نقوی اور وزیر اعظم کے مشیر برائے سیاسی و عوامی امور رانا ثناء اللہ بھی شریک تھے۔ملاقات میں ملک میں امن و امان کی صورتحال، دہشت گردی کے خلاف جاری اقدامات اور معیشت کی بہتری کے لیے کیے جانے والے حکومتی اقدامات پر سیر حاصل گفتگو کی گئی۔
صدرِ اور وزیرِ اعظم نے اس عزم کا اعادہ کیا کہ ملکی ترقی، جمہوری استحکام، قومی یکجہتی اور عوامی خوشحالی کے لیے تمام ادارے مل کر کام کرتے رہیں گے۔دونوں رہنماؤں نے اس بات پر زور دیاکہ دہشت گردی کا مکمل خاتمہ اور امن و امان کا قیام قومی ترجیح ہے جس کے لیے ریاستی ادارے پوری طرح پرعزم ہیں۔
