ویسٹ انڈیز کی کرکٹ ٹیم آسٹریلیا کے خلاف کنگسٹن میں کھیلے گئے تیسرے اور آخری ٹیسٹ میچ کی ایک اننگز میں صرف 27 رنز پر ڈھیر ہو گئی، یہ 70 سال کے دوران ٹیسٹ کرکٹ کا دوسرا کم ترین اسکور ہے۔ جمیکا میں کھیلے گئے سیریز کے تیسرے ڈے اینڈ نائٹ ٹیسٹ میچ میں ویسٹ انڈین بیٹنگ لائن مکمل طور پر ناکام رہی اور 204 رنز کے ہدف کے تعاقب میں پوری ٹیم تیسرے روز محض 27 رنز پر ڈھیر ہو گئی۔
تیسرے ٹیسٹ میں شاندار فتح کے ساتھ ہی آسٹریلیا نے ویسٹ انڈیز کے خلاف تین ٹیسٹ میچوں کی سیریز میں کلین سویپ بھی مکمل کرلیا۔تیسرے ٹیسٹ میچ کی چوتھی اننگز میں حیران کن طور پر ویسٹ انڈیز کے 7 کھلاڑی صفر پر آؤٹ ہوئے جن میں سے 4 کھلاڑی گولڈن ڈک یعنی پہلی ہی گیند پر آؤٹ ہوئے، آسٹریلوی فاسٹ باؤلر مچل اسٹارک نے تباہ کن باؤلنگ کرتے ہوئے صرف 9 رنز دے کر 6 وکٹیں حاصل کیں۔
مچل اسٹارک اس شاندار کارکردگی کے ساتھ نہ صرف اپنے 100ویں ٹیسٹ کو یادگار بنانے میں کامیاب رہے بلکہ ٹیسٹ کرکٹ میں 400 وکٹوں کا سنگ میل بھی عبور کر لیا۔واضح رہے کہ اس سے قبل جنوبی افریقہ کی ٹیم بھی دو مرتبہ 30 رنز پر آل آؤٹ ہو چکی ہے لیکن ویسٹ انڈیز کا یہ اسکور اب تاریخ کا دوسرا کم ترین ٹیسٹ اسکور بن چکا ہے۔
