وزیراعلیٰ پنجاب مریم نواز کا کہنا ہے کہ مسلم لیگ ن عوام کی امید بن چکی ہے، مشکلات اور چیلنجز کے باوجود امید کا دامن کبھی نہیں چھوڑنا چاہیے۔مریم نواز نے ’امید‘ کے عالمی دن پر اپنے پیغام میں کہا کہ ہمت و حوصلہ کریں تو امید کی روشنی یقین کا تمتماتا سورج بن جاتی ہے، امید ایک ایسا جذبہ ہے جو ہمیں آگے بڑھنے کی طاقت دیتا ہے۔وزیراعلیٰ پنجاب نے کہا کہ امید ہے انشاء اللہ فلسطین اور کشمیر کے عوام پر جلد آزادی کا سورج طلوع ہوگا۔انہوں نے کہا کہ پاکستانی قوم کی امیدوں پر پورا اترنے کیلئے دن رات کوشش کر رہے ہیں، پنجاب کے عوام کو اب صحت کی سہولتیں ملیں گی، ہر بچے کو لیپ ٹاپ، ہونہار سکالر شپ اور بہترین تعلیم ملے گی۔ان کا مزید کہنا تھا کہ امید ہے کہ پنجاب میں ہر بے گھر کو اپنی چھت کا سکھ ملے گی، پنجاب کا ہر کسان لہلہاتی فصلیں دیکھ کر خوش اور خوشحال ہوگا، امید ہمیں مایوسی کے اندھیرے میں بھی روشنی کی کرن تلاش کرنے کی آس دلاتی ہے۔
