وزیراعظم شہباز شریف، پاکستان مسلم لیگ ( ن ) کے صدر میاں نواز شریف، نائب وزیراعظم و وزیرخارجہ اسحٰق ڈار، بلاول بھٹو زرداری اور وزیر دفاع خواجہ آصف نے بھارت میں طیارہ حادثے اور اس میں ہلاکتوں پر افسوس کا اظہار کیا ہے۔
وزیراعظم شہباز شریف نے بھارت میں طیارہ حادثے پر اظہار افسوس کیا ہے، اپنے ایکس اکاؤنٹ پر انہوں نے مسافروں کے لواحقین سے ہمدری کا اظہار کرتے ہوئے لکھا کہ دعائیں متاثرہ خاندانوں کے ساتھ ہیں۔
مسلم لیگ ن کے صدر نواز شریف نے ایکس پر اپنے پیغام میں بھارت میں طیارہ حادثے پر اظہار افسوس کرتے ہوئے کہا ہے کہ یہ المناک سانحہ سرحدوں سے بالاتر ہے اور ہمیں مشترکہ انسانیت کی یاد دلاتا ہے، وزیر اعظم مودی اور بھارت کے عوام سے دلی ہمدردی کا اظہار کرتا ہوں۔
نائب وزیراعظم اور وزیرخارجہ اسحٰق ڈار نے بھی طیارہ حادثے پر افسوس کا اظہار کیا ہے، ایکس پر اپنے پیغام میں انہوں نے لکھا کہ احمد آباد، گجرات میں ایئر انڈیا کی پرواز کے حادثے پر دکھ ہوا، اس المناک واقعے میں قیمتی جانوں کے ضیاع پر تعزیت کا اظہار کرتے ہیں، دکھ کی اس گھڑی میں ہماری ہمدردیاں متاثرین کے اہل خانہ کے ساتھ ہیں۔
چیئرمین پیپلزپارٹی اور سابق وزیرخارجہ بلاول بھٹو زرداری نے ایکس پر اپنے پیغام میں کہا کہ آج احمد آباد کے قریب ایئر انڈیا کی پرواز جس میں تقریباً 240 مسافر سوار تھے، ٹیک آف کے فوراً بعد گر کر تباہ ہو گئی، اس افسوسناک واقعے کے بارے میں سن کر دکھ ہوا، میں بھارت کے عوام سے دلی تعزیت کا اظہار کرتا ہوں۔
وزیردفاع خواجہ آصف نے ایکس پر اپنے پیغام میں انہوں نے کہا کہ اس المناک حادثے پر ہمیں گہرا دکھ ہے، اور ہم طیارے میں سوار افراد کے اہل خانہ اور عزیز و اقارب سے دلی تعزیت کرتے ہیں۔
واضح رہے کہ آج سہ پہر بھارت کی ریاست گجرات میں احمد آباد ایئرپورٹ کے قریب برطانیہ کے شہر لندن کے لیے اڑان بھرنے والا ایئر انڈیا کا مسافر طیارہ ڈاکٹرز کے ہاسٹل کی عمارت پر گر کر تباہ ہوگیا۔
بھارتی ذرائع ابلاغ کے مطابق حادثے میں اب تک 200 سے زائد مسافروں کی ہلاکتوں کی تصدیق ہوئی ہے جبکہ ہلاکتوں میں اضافے کا خدشہ ظاہر کیا جارہا ہے کیونکہ طیارے پر عملے سمیت 242 مسافر سوار تھے، اور طیارہ شہری آبادی پر گرا ہے۔
