وزیر اعظم محمد شہباز شریف نے متحدہ عرب امارات کے ساتھ بہترین سیاسی تعلقات کو باہمی طور پر فائدہ مند اقتصادی شراکت داری تک بڑھانے کے لیے پاکستان کی بھرپور خواہش کا اعادہ کیا ہے۔وہ پیر کو اسلام آباد میں متحدہ عرب امارات کے نائب وزیراعظم اور وزیر خارجہ شیخ عبداللہ بن زید النہیان سے بات چیت کر رہے تھے۔
شہباز شریف نے مشترکہ تاریخ، باہمی احترام اور مضبوط ثقافتی اور اقتصادی روابط پر مبنی پاکستان اور متحدہ عرب امارات کے درمیان گہرے برادرانہ تعلقات کی تصدیق کی۔انہوں نے متحدہ عرب امارات کے صدر اور ابوظہبی کے حکمران شیخ محمد بن زاید النہیان کو اپنی گرمجوشی سے مبارکباد پیش کی اور مختلف شعبوں میں متحدہ عرب امارات کی پاکستان کے لیے مسلسل حمایت کو سراہا۔دوطرفہ تعاون کے مثبت انداز پر اطمینان کا اظہار کرتے ہوئے وزیراعظم نے دونوں ممالک کے درمیان تجارت، سرمایہ کاری، توانائی اور عوام سے عوام کے رابطوں میں تعاون بڑھانے پر زور دیا۔
ملاقات میں علاقائی صورتحال اور عالمی پیش رفت پر بھی تبادلہ خیال کیا گیا۔اس موقع پر شیخ عبداللہ بن زید النہیان نے متحدہ عرب امارات میں پاکستانی کمیونٹی کے تعاون کو سراہا اور دوطرفہ تعلقات کو مزید گہرا کرنے اور تعاون کی نئی راہیں تلاش کرنے کے اپنے ملک کے عزم کا اعادہ کیا۔
