وزیراعظم شہباز شریف نے عیدالفطر کے موقع پر آذربائیجان کے صدر الہام علیوف سے ٹیلی فونک رابطہ کیا۔وزیر اعظم نے صدر، ان کے خاندان اور آذربائیجان کے برادر عوام کے لیے دلی مبارکباد اور پرتپاک خواہشات کا اظہار کرتے ہوئے ان کی مسلسل امن اور خوشحالی کے لیے دعا کی۔دونوں رہنماؤں نے دونوں ممالک کے درمیان گہرے برادرانہ تعلقات کو مزید مضبوط بنانے کے اپنے مشترکہ عزم کا اعادہ کیا۔ گزشتہ ماہ وزیر اعظم کے دورہ باکو کی بنیاد پر دونوں رہنماؤں نے اس بات پر اتفاق کیا کہ آذربائیجان کے وزیر اقتصادیات آئندہ ماہ کے پہلے ہفتے میں اسلام آباد جائیں گے جہاں وہ نائب وزیر اعظم اسحاق ڈار سے بات چیت کریں گے اور وزیر اعظم شہباز شریف سے بھی ملاقات کریں گے۔
یہ دورہ دونوں فریقوں کے درمیان سرمایہ کاری کے کلیدی معاہدوں کو حتمی شکل دینے کو یقینی بنائے گا، جس سے صدر الہام علیوف کے آئندہ ماہ اسلام آباد کے متوقع دورے کا مرحلہ طے ہو گا۔شہباز شریف نے کہا کہ صدر الہام علیوف کا آئندہ دورہ پاکستان اور آذربائیجان تعلقات میں ایک سنگ میل ثابت ہو گا کیونکہ دونوں فریق دو ارب ڈالر کی سرمایہ کاری کے باہمی سود مند معاہدوں پر دستخط کریں گے جس سے دونوں ممالک کے درمیان سٹریٹجک پارٹنرشپ کے نئے باب کا آغاز ہو گا۔
