مشیر اطلاعات خیبرپختونخوا بیرسٹر ڈاکٹر سیف نے نواز شریف کی قومی سلامتی کمیٹی کے اجلاس میں عدم شرکت پر سوالات اٹھا دیئے۔اپنے بیان میں بیرسٹر ڈاکٹر سیف کا کہنا تھا کہ قومی سلامتی پارلیمانی کمیٹی کا اجلاس بلانے والے بتائیں نواز شریف کیوں نہیں آئے؟ کیا قومی سلامتی پارلیمانی کمیٹی کے اجلاس میں نواز شریف کی غیر موجودگی دہشت گردوں کی حمایت ہے؟انہوں نے کہا کہ اجلاس بلانے والے بتائیں نواز شریف نے اجلاس کا بائیکاٹ کیوں کیا، کیا ان کے پلیٹ لیٹس پھر گر گئے کہ اجلاس میں نہیں آئے۔
ان کا کہنا تھا کہ بانی پی ٹی آئی کوجیل میں قید کر کے حکومت نے قومی اتفاق رائے کو خود ناکام بنایا، گزشتہ پانچ آپریشنز کی طرح کسی نئے آپریشن سے پہلے قومی اتحاد کی طاقت سے مسلح ہونا اولین شرط ہے۔بیرسٹر سیف نے کہا کہ حکمرانوں کے شدت جذبات اور الفاظ کی تکرار دہشتگردی کا کچھ نہیں بگاڑ سکتے، پی ٹی آئی دہشتگردی کیخلاف قوم کے اتحاد اور احساسات کی حقیقی ترجمان ہے، پی ٹی آئی دہشتگردی کیخلاف قربانیاں دینے والے قوم کے بہادروں کے ساتھ کھڑی ہے۔
