پاکستان اور متحدہ عرب امارات نے ریلوے اور دیگر اقتصادی شعبوں میں دوطرفہ تعاون کو جاری رکھنے اور وسعت دینے پر اتفاق کیا ہے۔اس سلسلے میں یہ مفاہمت پیر کو اسلام آباد میں وزیر ریلوے حنیف عباسی اور پاکستان میں متحدہ عرب امارات کے سفیر احمد الطاہری کے درمیان ہونے والی ملاقات میں طے پائی۔ملاقات کے دوران متحدہ عرب امارات کے سفیر نے حنیف عباسی کو بطور وفاقی وزیر ریلوے کا نیا عہدہ سنبھالنے پر مبارکباد دی اور ان کی کامیابی کے لیے نیک خواہشات کا اظہار کیا۔
سفیر احمد الطاہری نے جعفر ایکسپریس پر ہونے والے حالیہ دہشت گردانہ حملے پر بھی گہرے دکھ کا اظہار کیا، جہاں دہشت گردوں نے ٹرین کو ہائی جیک کرنے کی کوشش کی اور مسافروں کو یرغمال بنا لیا۔انہوں نے حملے کی مذمت کی اور متاثرہ مسافروں اور ان کے اہل خانہ سے ہمدردی کا اظہار کیا۔ملاقات کے دوران دونوں معززین نے پاکستان اور متحدہ عرب امارات کے درمیان مضبوط دوطرفہ تعلقات بالخصوص ریلوے سیکٹر پر تبادلہ خیال کیا۔
اس بات کا ذکر کیا گیا کہ دونوں ممالک کے درمیان تمام شعبوں میں تعلقات مستحکم ہو رہے ہیں۔متحدہ عرب امارات کے سفیر نے کہا کہ پاکستان اور متحدہ عرب امارات کی دوستی غیر متزلزل ہے، دونوں ممالک کے درمیان بھائی چارے اور باہمی احترام کے گہرے رشتوں پر زور دیا۔ انہوں نے متحدہ عرب امارات کے دوطرفہ تعاون کو مزید بڑھانے کے عزم کا اعادہ کیا۔
اس موقع پر گفتگو کرتے ہوئے وزیر ریلوے حنیف عباسی نے روشنی ڈالی کہ پاکستان ریلویز ملکی اور بین الاقوامی سپلائرز کے ساتھ طویل مدتی معاہدوں کے ذریعے اپنی خدمات کو بہتر بنانے کے لیے مسلسل کام کر رہا ہے۔انہوں نے اس بات پر زور دیا کہ پاکستان کاروبار کے لیے سازگار ماحول فراہم کرتا ہے، جو سرمایہ کاروں کے لیے اہم مواقع پیش کرتا ہے۔وفاقی وزیر نے متحدہ عرب امارات کے ساتھ تجارتی تعلقات کو مضبوط بنانے اور دوطرفہ اقتصادی تعاون کو مزید وسعت دینے میں پاکستان کی گہری دلچسپی کا اظہار کیا۔بات چیت کے دوران دونوں اطراف نے ریلوے آپریشنز اور باہمی تجارتی مفادات کے مختلف پہلوؤں پر تبادلہ خیال کیا۔
