جماعت اسلامی خیبرپختونخواکے سابق امیر و سینیٹر (ر)مشتاق احمد خان کے بڑے بھائی کو صوابی میں ان کے گھر کے سامنے گولیاں مار کر قتل کردیا گیا۔پولیس کے مطابق شکیل احمد خان کو گھر کے سامنے گولیاں مارکر قتل کیا گیا، واقعہ صوابی کے گائوں احد خان کلے شیخ جانہ میں پیش آیا۔ڈی پی او صوابی محمد اظہر کا کہنا ہے کہ شکیل احمد خان اپنے ہمسائے کی فائرنگ سے جاں بحق ہوئے، ملزم نے پہلے والدکا قتل کیا، مقتول شکیل خان بیچ بچا ئوکے لیے گئے تھے۔ڈی پی او صوابی کے مطابق بیچ بچائو کے دوران شکیل خان فائرنگ کا نشانہ بنے۔
ڈی پی او صوابی کا کہنا ہے کہ مبینہ طور پر ملزم نشے کا عادی ہے، دماغی توازن بھی مکمل درست نہیں۔سوشل میڈیا پر جاری بیان میں سابق سینیٹر مشتاق احمد خان نے گہرے رنج و غم کا اظہار کرتے ہوئے کہا کہ بڑے بھائی شکیل احمد خان کو گائوں میں گھر کے سامنے شہید کیا گیا۔مشتاق احمد خان کا کہنا تھا کہ بڑے بھائی مجھے بہت عزیز تھے، یہ میرے دست وبازو تھے، یہ بدترین درندگی ہے۔مشتاق احمد خان کے بھائی کے قتل پر مختلف شعبوں سے تعلق رکھنے والے افراد نے افسوس اور دکھ کا اظہار کیا ہے۔
