پریذیڈنٹ ٹرافی گریڈ ون کے ساتویں راؤنڈ میں اوجی ڈی سی ایل نے کے آرایل کو 29 رنز سے ہرادیا۔غنی گلاس نے دفاعی چیمپئن ایس این جی پی ایل کو 5 وکٹوں سے شکست دیدی۔ ایس این جی پی ایل کی یہ اس ٹورنامنٹ میں چھٹی شکست ہے۔
واپڈا اورایشال ایسوسی ایٹس کا میچ ڈرا ہوگیا۔یوبی ایل اسپورٹس کمپلیکس میں کے آر ایل کو اوجی ڈی سی ایل کے خلاف جیتنے کے لیے230 رنز کا ہدف ملا تھا اس نے آج اپنی دوسری اننگز 140 رنز تین کھلاڑی آؤٹ پر شروع کی لیکن پوری ٹیم 200 رنز بناکر آؤٹ ہوگئی۔عمران رفیق نے56 رنز بنائے۔
مشتاق کلہوڑو نے اپنی عمدہ بولنگ فارم کو جاری رکھتے ہوئے 82 رنز دے کر6 وکٹیں حاصل کیں۔اس طرح انہوں نے میچ میں9 وکٹیں حاصل کیں۔ محمد عمر نے62 رنز دے کر 4 کھلاڑیوں کو آؤٹ کیا۔
این بی پی اسپورٹس کمپلیکس میں ایشال ایسوسی ایٹس کو واپڈا کے خلاف جیتنے کے لیے 368 رنز کا ہدف ملا تھا لیکن کھیل ختم ہونے پر وہ 4 وکٹوں کے نقصان پر 195 رنز بنانے میں کامیاب ہوسکی۔محمد سدیس نے56 رنز اسکور کیے۔دانش عزیز نے 50 رنز ناٹ آوٹ کی اننگز کھیلی۔
اس سے قبل واپڈا نے اپنی دوسری اننگز 246 رنز9 کھلاڑی آؤٹ پر ڈکلیئرکردی۔خالد عثمان صرف 7 رنز کی کمی سے سنچری مکمل نہ کرسکے۔ طاہر حسین نے 3 وکٹیں حاصل کیں۔ انہوں نے پہلی اننگز میں 9 وکٹیں حاصل کی تھیں۔
اسٹیٹ بینک اسٹیڈیم میں غنی گلاس کو ایس این جی پی ایل کے خلاف جیت کے لیے 176 رنز کا ہدف ملا تھا ۔ اس نے 5 وکٹوں پر مطلوبہ اسکور بنالیا۔شرجیل خان نے 11 چوکوں اور ایک چھکے کی مدد سے57 رنز بنائے۔
جنید علی نے 38 اور حماد بٹ نے 36 رنز اسکور کیے۔ یاسر شاہ نے تین وکٹیں حاصل کیں۔
اس سے قبل ایس این جی پی ایل کی ٹیم دوسری اننگز میں 340 رنز بناکر آؤٹ ہوگئی۔ حسیب اللہ خان نے94 رنز اسکور کیے۔ سیف اللہ بنگش نے62 اور یاسرشاہ نے 40 رنز کی اننگز کھیلی۔
میر حمزہ نے 53 رنز دے کر 4 وکٹیں حاصل کیں۔ رمیز جونیئر نے تین کھلاڑی آؤٹ کیے۔
