چیئرمین پاکستان کرکٹ بورڈ محسن نقوی کی زیر صدارت پی سی بی کے بورڈ آف گورنرز کا اجلاس نیشنل کرکٹ اکیڈمی کے بورڈ روم میں منعقد ہوا۔ اجلاس میں 117 دن کی ریکارڈ مدت میں قذافی سٹیڈیم کی تعمیر نو مکمل کرنے پر چئیرمین پی سی بی محسن نقوی اور ان کی پوری ٹیم سے خصوصی طور پر تشکر کا اظہار کیا گیا،بی او جی کے ممبران نے قذافی سٹیڈیم کے تعمیر نو کے پراجیکٹ کی تکمیل پر محسن نقوی اور پی سی بی کی ٹیم کو مبارکباد دیتے ہوئے کہا کہ آپ نے ناممکن کو ممکن بنا دیا ہے اور اس پراجیکٹ سے تمام پراپیگنڈہ بھی دم توڑ گیا ہے۔اتنی قلیل مدت میں ایک شاندار سٹیڈیم کی تکمیل صرف محنت اور لگن سے ممکن ہوئی ہے۔ ہم خود بھی حیران ہیں اور ہمیں یقین نہیں آ رہا کہ سٹیڈیم مکمل ہو چکا ہے۔
چئیرمین محسن نقوی نے اس کامیابی کو اپنی انفرادی محنت نہیں بلکہ پوری ٹیم کی مشترکہ کاوشوں کا نتیجہ قرار دیتے ہوئے کہا کہ یہ میرے انفرادی کام کا نتیجہ نہیں ہے، بلکہ یہ کامیابی ہماری پوری ٹیم کی محنت کا نتیجہ ہے۔ میں اللہ کا شکر گزار ہوں کہ ہماری مخلصانہ کوششیں رنگ لائیں۔ ہم نے تنقید کی پرواہ نہیں کی اور اللہ کی مدد سے آگے بڑھتے گئے۔انہوں نے مزید کہا کہ میری ٹیم اور خاص طور پر ورکرز نے اس خواب کو حقیقت کا روپ دیا ہے۔اجلاس میں پی سی بی کے مختلف امور کی منظوری دی گئی اور بورڈ آف گورنرز کی گزشتہ میٹنگ کے فیصلوں کی توثیق کی گئی۔اجلاس کے اختتام پر انوار غنی نے خصوصی دعا کی۔ اجلاس میں چیف آپریٹنگ آفیسر سمیر احمد، چیف ایگزیکٹو آفیسر پی ایس ایل سلمان نصیر، چیف فنانشل آفیسر جاوید مرتضی۔ بورڈ آف گورنرز کے ممبران ظہیر عباس، انوار غنی، دانیال گیلانی، طارق سرور، سجاد علی کھوکھر، ظفر اللہ اور دیگر نے شرکت کی۔
