پاکستان اور چین نے اپنے مشترکہ مستقبل کی تعمیر کے لیے عوامی اور ثقافتی تبادلوں کو وسعت دینے کی اہمیت پر زور دیا ہے۔ یہ بات جمعرات کو بیجنگ میں صدر آصف علی زرداری اور چینی وزیراعظم لی کیانگ کے درمیان ہونے والی ملاقات میں زیر بحث آئی۔
دونوں رہنماؤں نے مشترکہ ترقی اور خوشحالی کے فروغ کے لیے چین پاکستان اقتصادی راہداری (CPEC) 2.0 کے تحت اعلیٰ معیار کی ترقی پر بات چیت کی۔ اس میں قابل تجدید توانائی، سائنس اور ٹیکنالوجی، انفراسٹرکچر اور زراعت جیسے شعبوں میں تعاون کو مزید گہرا کرنے پر زور دیا گیا۔
ملاقات میں دونوں فریقوں نے کاروبار سے کاروبار اور نجی شعبے کے روابط کے ذریعے تجارتی اور اقتصادی تعلقات کو مزید بڑھانے کے امکانات پر بھی تبادلہ خیال کیا۔
صدر آصف علی زرداری نے پاکستان اور چین کی "آل ویدر اسٹریٹجک کوآپریٹو پارٹنرشپ” کی پائیدار نوعیت پر روشنی ڈالی، جسے دونوں ممالک کے رہنماؤں کی پے در پے نسلوں نے مزید مستحکم کیا ہے۔ انہوں نے دوطرفہ تعلقات کو مزید مستحکم کرنے کے لیے پاکستان کے عزم کا اعادہ کیا اور دونوں ممالک کے درمیان گہری اور پائیدار شراکت داری پر زور دیا۔
صدر نے چین پاکستان اقتصادی راہداری (CPEC) کے علاقائی روابط اور اقتصادی ترقی میں اہم کردار کو سراہا اور چین کی پاکستان کے ترقیاتی ایجنڈے کے لیے مسلسل حمایت کو خراج تحسین پیش کیا۔
