پاکستان اسپورٹس بورڈ (PSB) نے پاکستان ویٹ لفٹنگ فیڈریشن (PWF) کے آئندہ انتخابات، جو یکم فروری 2025 کو ہونے والے ہیں، میں شرکت سے گریز کرنے کی باضابطہ ہدایت جاری کر دی ہے۔ اس فیصلے کی بنیاد معزز اسلام آباد ہائی کورٹ کے 18 جولائی 2024 کو جاری کردہ حکم پر ہے۔
اسلام آباد ہائی کورٹ نے رٹ پٹیشن نمبر 2524/2022 میں یہ ہدایت دی تھی کہ جب تک پاکستان اسپورٹس بورڈ 2022 کے آئین کے مطابق متعلقہ ضوابط کو باقاعدہ طور پر مطلع نہیں کرتا، تب تک کوئی انتخابات نہیں کرائے جائیں گے۔ عدالت نے پاکستان اسپورٹس بورڈ کو یہ ہدایت کی تھی کہ وہ انتخابی عمل کے لیے ضوابط جاری کرے، ماڈل آئین فراہم کرے اور ایک الیکشن کمیشن تشکیل دے۔
پاکستان اسپورٹس بورڈ کی جانب سے جاری بیان میں کہا گیا ہے کہ عدالت کے فیصلے کی روشنی میں، PSB کے بورڈ نے 4 دسمبر 2024 کو اپنے 31ویں اجلاس میں الیکشن کمیشن اور انتخابی ضوابط کی تشکیل کی منظوری دی تھی۔ اس کے علاوہ، انتخابی عمل کے پہلے مرحلے کے طور پر صوبائی اسپورٹس بورڈز کے ذریعے کلبوں اور ایسوسی ایشنز کی جانچ پڑتال جاری ہے۔
پاکستان سپورٹس بورڈ نے نے تمام متعلقہ حکام، بشمول صوبائی اسپورٹس بورڈز اور ان کی متعلقہ ویٹ لفٹنگ ایسوسی ایشنز، سے اپیل کی ہے کہ وہ عدالت کے حکم پر سختی سے عمل درآمد کریں اور ان غیر قانونی انتخابات میں حصہ لینے سے گریز کریں۔ اس ہدایت کی خلاف ورزی کو توہین عدالت سمجھا جا سکتا ہے۔
پاکستان اسپورٹس بورڈ کا یہ اقدام اس بات کو یقینی بنانے کے لیے اٹھایا گیا ہے کہ پاکستان کی اسپورٹس فیڈریشنز میں انتخابی عمل کی شفافیت اور قانونی سالمیت کو برقرار رکھا جائے۔
