سندھ کپ اسنوکر ٹورنامنٹ 2024 کا 32 واں ایڈیشن شاندار فائنل کے ساتھ اختتام پذیر ہوا، جہاں ذوالفقار اے قادر نے اے ستار کو 5-4 کے سنسنی خیز مقابلے میں شکست دے کر ٹائٹل اپنے نام کیا۔ یہ میچ انتہائی دلچسپ اور سخت مقابلے کا تھا، دونوں کھلاڑیوں نے شاندار کھیل کا مظاہرہ کیا، لیکن ذوالفقار کی مہارت اور برتری نے اسے فتح دلائی۔فائنل میں جیت کا سکور یہ رہا اے ستار 12-60، 14-74، 27-77، 61-16، 58-45، 61-33، 34-69، 99-11، 58-11 – ذوالفقار اے قادر ۔
ذوالفقار اے قادر نے فائنل میں اپنے پُراعتماد اور حکمت عملی سے بھرپور کھیل کے ذریعے اسنوکر کا شاندار مقابلہ جیتا، اور اپنے حریف اے ستار کو شکست دے کر ٹورنامنٹ کی ٹرافی اپنے نام کی۔ اے ستار نے اس ٹورنامنٹ میں بہترین کھیل کا مظاہرہ کیا، مگر وہ فائنل میں کامیابی حاصل نہ کر سکے۔
فائنل کے اختتام پر مہمان خصوصی چیئرمین پی بی ایس اے عالمگیر شیخ نے کامیاب کھلاڑیوں میں انعامات تقسیم کئے، اس موقع پر سیکرٹری سندھ بلیئرڈ اینڈ سنوکر ایسوسی ایشن نوید کباڈیہ بھی موجود تھے۔
ٹورنامنٹ کے لیے مجموعی انعامی رقم 300,000 روپے رکھی گئی تھی۔ ذوالفقار اے قادر کو 110,000 روپے کی انعامی رقم دی گئی، جبکہ اے ستار کو رنر اپ کے طور پر 55,000 روپے ملے۔ سیمی فائنل میں پہنچنے والے دونوں کھلاڑیوں کو 30,000 روپے ہر ایک کی صورت میں انعام دیا گیا، جب کہ کوارٹر فائنل میں پہنچنے والے کھلاڑیوں کو 15,000 روپے ہر ایک کی رقم دی گئی۔
سب سے زیادہ بریک کا ایوارڈ حیدرآباد کے کھلاڑی عمر نعیم نے حاصل کیا، جنہوں نے 118 کا شاندار بریک بنایا اور 15,000 روپے کی انعامی رقم جیتی۔
