پاکستان اور بیلاروس نے باہمی فائدہ مند تعاون کو فروغ دینے کے عزم کا اعادہ کیا ہے۔یہ بات پیر کو اسلام آباد میں نائب وزیراعظم محمد اسحاق ڈار اور بیلاروس کے وزیر خارجہ میکسم رائزنکوف کے درمیان ہونے والی ملاقات میں سامنے آئی۔
فریقین نے پاکستان اور بیلاروس کے درمیان دو طرفہ تبادلوں اور اعلیٰ سطح کے دوروں کی رفتار پر اطمینان کا اظہار کیا اور اس امید کا اظہار کیا کہ صدر الیگزینڈر لوکاشینکو کے دورے سے دو طرفہ تعلقات کو مزید فروغ ملے گا۔
انہوں نے مشرق وسطیٰ کی صورتحال سمیت اہم علاقائی اور عالمی پیش رفت پر بھی تبادلہ خیال کیا۔ انہوں نے تنازعات کے پرامن حل کے لیے اپنی حمایت کا اظہار کیا اور غزہ میں انسانی صورت حال سے نمٹنے کے لیے ایک مربوط نقطہ نظر کی ضرورت پر زور دیا۔دونوں فریقوں نے باہمی دلچسپی کو آگے بڑھانے اور عالمی چیلنجوں سے مشترکہ طور پر نمٹنے کے لیے بین الاقوامی اور علاقائی تنظیموں میں تعاون بڑھانے کی اہمیت پر زور دیا۔
